ԵՐԵՎԱՆ, 7 մայիսի — Sputnik. «Եվրատեսիլ» երգի միջազգային մրցույթի կազմակերպիչներն այս տարի որոշել են մեղմացնել դրոշների իրենց քաղաքականությունը, այս մասին նրանք հայտնել են Ֆեյսբուքի իրենց էջում։
Եվրոպական հեռարձակողների միության հայտարարությունում նշված է, որ չճանաչված պետությունների դրոշներն այլևս արգելված չեն։
«Տարբեր պատվիրակությունների հետ տևական քննարկումներից հետո Եվրատեսիլ մրցույթի կազմակերպիչները համաձայնեցին մեղմացնել դրոշների քաղաքականությունը և ի թիվս ԵՄ-ի անդամ (թեկուզ մրցույթին չմասնակցող) երկրների, ԵՄ-ի, ինչպես նաև ԼԳԲՏ համայնքի խորհրդանիշ համարվող ծիածանի դրոշների՝ ազգային, տարածաշրջանային և լոկալ դրոշները նույնպես թույլատրված են»,- գրված է հայտարարության մեջ։
Ավելի վաղ տեղեկություն էր տարածվել, որ «Եվրատեսիլ» մրցույթի այս տարվա դրոշների քաղաքականության համաձայն` Արցախի դրոշն արգելված դրոշների ցանկում էր: Ավելի ուշ Եվրոպական հեռարձակողների միությունը ներողություն էր խնդրել բոլոր նրանցից, ում վիրավորել էր «Եվրատեսիլ» երգի միջազգային մրցույթի ընթացքում արգելված դրոշների ցանկի հրապարակումը: Հայտարարության մեջ նշվել էր, որ հրապարակվել է միայն դրոշների վերաբերյալ փաստաթղթի նախագիծը, որը հրապարակման ենթակա չէր:
