ԵՐԵՎԱՆ, 6 մայիսի — Sputnik. «analitik.am» խմբագրության աշխատակիցների կողմից շորթում կատարելու վերաբերյալ քրեական գործն ընդունվել է ՀՀ հատուկ քննչական ծառայության վարույթ, հայտնում է ՀՀ Հատուկ քննչական ծառայությունը
«ՀՀ ԱԺ պատգամավորը ոստիկանության կազմակերպված հանցավորության դեմ պայքարի գլխավոր վարչությունում հաղորդում է տվել այն մասին, որ «analitik.am» լրատվական կայքի տնօրենը կայքում պարբերաբար իր անձի, ընտանիքի անդամների, ինչպես նաև իր` որպես ԱԺ պատգամավորի գործունեությանը վերաբերող սուտ տեղեկատվություններ, զրպարտություններ և վարկաբեկիչ այլ նյութեր հրապարակելու կապակցությամբ հանդիպումներ է ունեցել իր հետ, և նմանօրինակ հրապարակումները չդադարեցնելու ու հետագայում նույնաբովանդակ այլ հոդվածներ հրապարակելու սպառնալիքով՝ իրենից պահանջել է յուրաքանչյուր ամիս վճարել 300 հազ. ՀՀ դրամ»,- ասված է հաղորդագրությունում:
2016 թվականի մայիսի 5-ից հիշյալ քրեական գործը քննվում է ՀՀ հատուկ քննչական ծառայությունում:
Նախաքննությունը շարունակվում է:
