ԵՐԵՎԱՆ, 5 մայիսի — Sputnik. Երևանի քաղաքապետարանի և «Հայաստան» համահայկական հիմնադրամի ներկայացուցիչները սփյուռքի նախարարության նիստին ներկայացրեցին 2012 թվականից սկսած սիրիահայերին տրամադրված օգնության քանակը։
«Հայաստան» համահայկական հիմնադրամի գործադիր տնօրենի խորհրդական Աիդա Խաչիկյանը հայտնեց, որ 2012 թվականին, երբ բացվեց հիմնադրամի սիրիահայերի օգնության համար նախատեսված առանձին հաշվեհամարը, հաշվեհամարին 281 մլն դրամի գումար ստացվեց։
Գումարը փոխանցել էին մի շարք կազմակերպություններ, ինչպես նաև մասնավոր անձինք, խոշոր գումարներ հիմնականում ստացվել էին Գերմանիայից, Շվեդիայից և Ֆրանսիայից։
2015 թվականին բարեգործական հաշվեհամարին ստացվել է ավելի քան 11 մլն դրամ, իսկ այս տարի` շուրջ 32 մլն դրամ։ Ընդհանուր առմամբ օգնության գումարը կազմել է 326 մլն 74 հազար դրամ։
Քաղաքապետարանի սոցիալական ապահովման վարչության պետ Ռուզաննա Զաքարյանն իր հերթին նշեց, որ Երևանի քաղաքապետարանն ակտիվորեն զբաղվել է 2012 թվականի հունվարից մայրաքաղաք ժամանող սիրիահայերի (Հայաստանում փախստականների ընդհանուր քանակի 90-95 տոկոսը) սոցիալական խնդիրների լուծման հարցերով։
«2012-2016 թվականների ընթացքում քաղաքապետարանը ֆինանսական աջակցություն է տրամադրել 463 կարիքավոր ընտանիքի` 11 մլն 562 հազար դրամի չափով։ 2763 ընտանիքի տարբեր տեսակի օգնություն է ցուցաբերվել, այդ թվում` նրանց ապահովել են հագուստով և հոգացել վարձակալության ծախսերը», — ասաց Զաքարյանը։
Եվս 2063 ընտանիքի, նրա խոսքով, պարենային օգնություն է տրամադրվել։ 2015 թվականի ընթացքում պետական աջակցության տարբեր սոցիալական ծրագրերում ընդգրկվել է 322 ընտանիք, իսկ 2016 թվականին` 77 ընտանիք։
Հիմնականում արտահերթ կարգով Երևանի մանկապարտեզներում գրանցել է 169 երեխա, իսկ միջնակարգ հաստատություններում սովորում է 467 աշակերտ։ Եվս 33 երեխա սովորում է Սպենդիարյանի անվան երաժշտական դպրոցում, որոնցից 11-ը` անվճար հիմունքներով։
Բուժօգնության տրամադրման անհրաժեշտության հարցը հատուկ ընդգծեց սփյուռքի նախարար Հրանուշ Հակոբյանը։ Նա մասնավորապես բարձրացրեց սրտի վիրահատությունների ֆինանսավորման հարցը։
Հակոբյանը հիմնադրամին առաջարկեց տարբեր երկրների 25 ներկայացուցչությունների հաղորդագրություն ուղարկել բարեգործական հանգանակություն տրամադրելու խնդրանքով, նվազագույնը` 1000 դոլարի չափով։
«Կարծում եմ` դա կարող է օգնել լուծելու մեր հայրենակիցների խնդիրները», — ասաց Հակոբյանը։
Վերջին տվյալների համաձայն` Հայաստանում շուրջ 17 հազար սիրիահայ է բնակվում։
