ԵՐԵՎԱՆ, 4 մայիսի — Sputnik. Արևմտյան Վիրջինիան դարձավ ԱՄՆ 44-րդ նահանգը, որը ճանաչեց Հայոց ցեղասպանության փաստը, հայտնում է Ամերիկայի Հայ ազգային կոնգրեսը` հղում անելով Արևմտյան Վիրջինիայի նահանգապետ Էրլ Ռեյ Թոմբլինի ներկայացրած հռչակագրին։
Արևմտյան Վիրջինիայի նահանգապետի հռչակագրում հիշատակվում է 1915-1923 թվականներին մեկուկես միլիոն հայերի և մեկ միլիոն հույների և ասորիների սպանությունը, ինչպես նաև քրիստոնյաների, եզդիների և այլ փոքրամասնությունների շարունակվող ոչնչացումը։
«Ճանաչելով և մշտապես հիշելով Հայոց ցեղասպանությունն ու Հոլոքոստը, ինչպես նաև բոլոր անցյալի և ներկայի ցեղասպանությունները` մենք պահպանում ենք պատմական հիշատակը, երաշխավորում, որ նման դաժանությունները չեն կրկնվելու, և զգոն են քմնում ատելության, հալածանքի և բռնության նկատմամբ», — գրված է հաղորդագրության մեջ:
Տեղի հայ համայնքի ներկայացուցիչներ Համբարձում Կասպարյանը, Նենսի և Էմի Թոլիվերները մեծ աշխատանք են տարել հռչակագրի ընդունման գործընթացում:
«Այսպիսով` Արևմտյան Վիրջինիան դարձավ 44-րդ նահանգը, որն արեց դա։ Սա հզոր ազդանշան է միջազգային հանրությանն ու Օբամայի աշխատակազմին` մենք չենք կարող կուլ գնալ Հայոց ցեղասպանությունը ժխտող թուրքական քարոզարշավին», — ասաց նա։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
