ԵՐԵՎԱՆ, 2 մայիսի — Sputnik. Բուհական տարկետման իրավունքը չեղյալ հայտարարելու նախագիծն, առաջին հերթին, ուղղված է սոցիալական արդարության ապահովմանը, կարծում է ԱԺ պատգամավոր Թևան Պողոսյանը։
Հայաստանի կառավարության վարչակազմի ղեկավար Դավիթ Հարությունյանն օրեր առաջ հայտնել էր, որ մեկ ամսվա ընթացքում ԱԺ քննարկման է դրվելու բուհական տարկետման իրավունքը չեղյալ հայտարարելու մասին օրինագիծը։ Այս նախագծի կողմնակիցներից մեկը պատգամավոր Թևան Պողոսյանն է։
Պողոսյանի խոսքով՝ օրենքի նախագծի քննարկումը հենց հիմա՝ մայիսին, պետք է սկսվեր և դա կապված չէ ապրիլյան պատերազմի հետ։
«Այս իրավիճակն էլ, որ եղավ ապրիլի 2-ից հետո և Պաշտպանության նախարարի մեկնաբանությունը, թե ինչու կա այդ սոցիալական անարդարությունը և ապահով ընտանիքների երեխաները կարողանում են օգտվել տարկետման իրավունքից, հետո եղավ պատգամավոր Ռուբիկ Հակոբյանի հարցը՝ հիմնվելով այդ մեկնաբանության վրա։ Եվ առաջին անգամ մենք իմացանք, որ կառավարությունն ունի իր սեփական նախաձեռնությունը»,- ասաց պատգամավորը։
Նա նշեց, որ բանակից խուսափելու մի քանի տարբերակ կա` երկրից դուրս գալ, վերադառնալ 27 տարեկանը լրանալուց հետո և տուգանք վճարել, բանակից ազատվել առողջական վիճակի պատճառով (այստեղ կոռուպցիոն ռիսկերը բավական բարձր են)։ Երրորդ ճանապարհը կրթական համակարգն է, այսինքն` բուհերի անվճար տեղերը։
Պատգամավորի կարծիքով` պետք է բոլորի համար հավասար պայմաններ ստեղծել, իսկ ուսումը կարելի է շարունակել նաև բանակից հետո։
Պատգամավորը նաև նշեց, որ օրինագծի շրջանակում օժտված երաժիշտները, մարզիկներն ու գիտությամբ հետաքրքրվող երեխաները զարգանալու հնարավորություն կունենան։ Միաժամանակ նա կոչ արեց նորմալ վերաբերվել այն երեխաներին, ովքեր բանակից ազատվել են օրինական հիմքով։
ՀՀԿ պատգամավոր Շիրակ Թորոսյանն իր հերթին նշեց, որ տարկետումների քանակը վերջին տարիներին նվազել է։ Այժմ տարկետում են ստանում միայն այն ուսանողները, ովքեր անվճար են ընդունվում։
«Թյուր կարծիք կա, թե բանակից հետո երիտասարդների մոտ նվազում է գիտությամբ զբաղվելու ցանկությունը։ Ասեմ, որ բանակից հետո մարդիկ ավելի կայացած են լինում և ավելի լավ են գիտակցում իրենց ընտրությունը», — ասաց Թորոսյանը։
Նա համաձայնեց, որ այն մարդկանց համար, ովքեր իրենց տաղանդը ցուցադրել են տարբեր միջազգային օլիմպիադաների և մրցույթների ժամանակ, ցույց են տվել իրենց արտասովոր գիտելիքները, նրանց համար պետք է այլընտրանք գտնել։
Պատգամավորն ընդգծեց, որ այս օրինագիծը կլուծի ազգային անվտանգության հարցը։
