ԵՐԵՎԱՆ, 28 ապրիլի — Sputnik. Արտակ Բեգլարյանը հայտնեց, որ հակառակորդի հասցրած վնասներն ամեն օր փոխվում են. նախորդ երկու օրերին հատկապես մեծ վնաս է հասցվել Մարտակերտին, տասնյակ տներ են վնասվել։
«Նախորդ գիշեր արկակոծել են Ներքին Հոռաթաղը, վնասվել է էլեկտրամատակարարման ցանցը, բայց ընթանում են վերականգնման աշխատանքներ, էլեկտրականությունը վերականգնվել է ներքին Հոռաթաղում»,- հայտնեց Բեգլարյանը։
Ըստ նրա` Մատաղիսում նույնպես եղել է արկակոծություն, բայց լուրջ վնասներ չկան։ Նշված վայրերի բնակիչները հիմնականում տարհանվել են, բայց տղամարդկանց մի մասն այնտեղ է։
«Բնակիչների հիմնական մասը ցերեկները վերադառնում է, գյուղում շարունակվում է սովորական կյանքը, ոմանք աշխատանքի են գնում, բայց քանի որ վերջին մի քանի օրերին հիմնականում գիշերն է արկակոծվում, այդ պատճառով շատերը դուրս են գալիս գյուղից գիշերը»,- նշեց նա։
Ըստ Բեգլարյանի` Մատաղիսում և Մարտակերտում դպրոցները և մանկապարտեզները չեն գործում, քանի որ վտանգը բավականին մեծ է։
«Կառավարությունը հոգում է նրանց սոցիալական կարիքները, ձեռնարկվում են համապատասխան միջոցներ, նրանք ապահովվում են սննդով, կացարանով։ Կան ընտանիքներ, որոնք պատսպարվել են հարազատների տներում, բայց բոլոր կարիքավորին ցուցաբերվում է աջակցություն»,- ընդգծեց Բեգլարյանը։
Նա հայտնեց նաև, որ ապրիլի 27-ի երեկոյի դրությամբ ԼՂՀ աջակցության հաշվեհամարին փոխանցվել է 3 մլրդ 635 մլն դրամ, այդ թվում` արտարժութային փոխանցումները։ Միայն ապրիլի 27-ին փոխանցվել է 147 մլն դրամ։
«Սկզբնական շրջանում քաղաքացիները, ընկերություններն իրենց ցանկությամբ ուղարկում էին ապրանք, բայց դրանց մի մասն այնքան էլ պետքական չէր։ Հիմա մենք նպատակային ասում ենք, թե կոնկրետ ինչի կարիք կա, և նրանք ուղարկում են համապատասխան ապրանքը»,- նշեց Բեգլարյանը։
Մամուլի խոսնակը հայտնեց նաև, որ աջակցության հաշվեհամարին փոխանցված միջոցներն ուղղվելու են ոչ միայն բանակի սպառազինությանը, այլ ընդհանրապես մարտունակության բարձրացմանը։
