ԵՐԵՎԱՆ, 28 ապրիլի — Sputnik. ԼՂՀ ՊԲ մամուլի ծառայությունը լուսանկարներ է հրապարակել, որոնք վկայում են այն մասին, որ Ադրբեջանը ռազմական օբյեկտներ է տեղակայել բնակավայրերում ու դրանց մերձակա տարածքներում։
«ԼՂՀ զինված ուժերի համար նկարներում նշված բոլոր ռազմական օբյեկտները հանդիսանում են լեգիտիմ թիրախներ»,- հիշեցնում է ԼՂ ՊԲ մամուլի ծառայությունը` վկայակոչելով «Միջազգային զինված ընդհարումների զոհերի պաշտպանության մասին» 1949թ. Ժնևի կոնվենցիան։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում է ձեռք բերվել պայմանավորվածություն ռազմական գործողությունները դադարեցնելու մասին, սակայն երկու կողմերն էլ հայտարարում են, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
