ԵՐԵՎԱՆ, 28 ապրիլի — Sputnik. Հայաստանի Ազգային ժողովն ընդունեց ՀՀ Ընտրական օրենսգրքի և կից ներկայացված օրենքների նախագծի փաթեթն առաջին ընթերցմամբ:
Ընտրական նոր օրենսգիրքն ընդունվեց 98 կողմ, 9 դեմ, 5 ձեռնպահ ձայնով:
«Անգամ եթե ընդդիմության բոլոր առաջարկներն ընդունվեն, նրանք միևնույն է «դեմ» կարտահայտվեն»,- ասաց ՀՀԿ խմբակցության ղեկավար Վահրամ Բաղդասարյան։
ՀՀԿ պատգամավորի խոսքով` նոր օրենսգրքում տեղ են գտել ընդդիմության բարձրացրած բոլոր առաջարկները։ Նույն կարծիքն ուներ ՀՀԿ կոալիցիայի գործընկերը` Դաշնակցությունը։
Կառավարության աշխատակազմի ղեկավար-նախարար Դավիթ Հարությունյանի խոսքով` նոր ԸՕ նախագծի հեղինակները ցանկացել են ստեղծել կեղծիքներից պաշտպանվելու մեխանիզմներ։
«Նույնիսկ նրանք, ովքեր հանդես են եկել օրենսգրքի դեմ, հետաքրքիր մտքեր են հայտնել, որոնք կարող են տեղ գտնել փաստաթղթում։ Այդ առաջարկները կարձանագրվեն` անկախ այդ պատգամավորների քվեարկությունից»,- ասաց Հարությունյանը։
Նա նշեց, որ լրացուցիչ երաշխիքներ կտրվեն վստահված անձանց, որոնց կարող են հեռացնել ընտրատեղամասից միայն հանձնաժողովի 2/3 համաձայնությունը ստանալուց հետո։
Նոր ԸՕ-ի հեղինակները փորձել են հաշվի առնել ընդդիմության և ՀԿ-ների քննադատությունն ու կատարել են մի շարք փոփոխություններ։
Մասնավորապես` օրենքի նախագծում ընդդիմության առաջարկած ընտրողների մատներին թանաքով նշումների փոխարեն առաջարկվել է ստուգել դրանք մատնահետքերի օգնությամբ:
Մեկ այլ կարևոր փոփոխություն է այն, որ քվեարկած ընտրողների ցուցակների հրապարակումների փոխարեն իշխանություններն առաջարկել են տրամադրել այդ տվյալները լրագրողներին և վստահված անձանց հենց ընտրատեղամասում` դրա փակումից հետո։
Իշխանությունները համաձայնել են ընտրատեղամասերում տեսախցիկներ տեղադրելու առաջարկին, սակայն դոնոր կազմակերպությունների գտնվելու հարցը բաց է։
Ընդդիմադիր Հայ ազգային կոնգրեսը դեռ Ընտրական օրենսգրքի քննարկման սկզբում հայտարարեց, որ չի մասնակցի քննարկմանը, քանի որ իրենց առաջարկները չեն ընդունվել իշխանության կողմից։
«Մենք մեր կողմից ամեն ինչ արել ենք, առաջարկել ենք իշխանություններին փոխզիջումային տարբերակ` համաձայնեցված 13 կուսակցությունների և 220 հասարակական կազմակերպությունների հետ։ Բայց նրանք դա էլ չեն ընդունել»,- ասաց ՀԱԿ խորհրդարանական խմբակցության քարտուղար Արամ Մանուկյանը օրենսգրքի քննարկման սկզբում։
Համաձայնության ձախողման մասին հայտարարեցին նաև «Օրինաց երկիր» կուսակցության ներկայացուցիչները։
Իր հերթին փոխխոսնակ Հերմինե Նաղդալյանը հայտարարեց, որ համաձայնությունը չի կայացել այն պատճառով, որ իշխանություններն ու ընդդիմությունը չեն վստահում միմյանց։
