ԵՐԵՎԱՆ, 14 ապրիլի — Sputnik. Դավիթ Հարությունյանը ներկայացրեց 2 կարևոր նորամուծություն, որոնք, ըստ նրա, էական փոփոխություն կլինեն ընտրական գործընթացը վերահսկելու հարցում։ Ընտրական նոր օրենսգրքի նախագիծը մշակողները, Հարությունյանի խոսքով, ցանկացել են պաշտպանական մեխանիզմներ ստեղծել զեղծարարությունից։ Առաջին առաջարկը հետևյալն է` փոխել ծրարների ձևը, այսինքն` դրանց մի անկյունը պետք է լինի կտրված, այդտեղից էլ կերևա քվեաթերթիկը։ Քվեախցիկի համար պատասխանատու հանձնաժողովի անդամն էլ իր ձեռքում պետք է համապատասխան թվով դրոշմանիշներ ունենա։
«Հանձնաժողովի այդ անդամը պետք է վերցնի մասնակցի քվեարկության կտրոնը և դրա դիմաց փակցնի ինքնասոսնձվող դրոշմանիշը` բացվածքի միջոցով բուն քվեաթերթիկի վրա։ Միայն դրանից հետո պետք է տա քվեարկելու կտրոն։ Եթե չկա դրոշմանիշ, ուրեմն քվեաթերթիկը ոչինչ է»,-ասաց Դավիթ Հարությունյանը։
Քվեարկությունից հետո հանձնաժողովի անդամը պետք է վերադարձնի մնացած դրոշմանիշները և քվեարկության մասնակցի կտրոնը։ Պետք է ճիշտ թվով դրոշմանիշ ու կտրոն վերադարձնի, հակառակ դեպքում նրա գործերը կուղարկվեն իրավապահ մարմիններ։
«Կտրոնները փաստաթղթեր են, որոնք պետք է լրացվեն այն սարքի միջոցով, որը ստուգում է տեղամաս մտած անձի փաստաթուղթն արդյո՞ք համապատասխանում է այդ տեղամասի ընտրացուցակում առկա մարդու փաստաթղթին»։ Հաջորդ կարևոր կետը` արդյո՞ք նա առաջին անգամ է մտնում ընտրատեղամաս։ Եթե երկու պատասխանն էլ «այո» է, ուրեմն կտրոնը կտպվի»,-ասաց Հարությունյանը։
Ի դեպ, կտրոնները ձեռքով չեն լրացվում, այսինքն մարդկային գործոնը բացառվում է։
ՀԱԿ խմբակցության պատգամավոր Լևոն Զուրաբյանի պահանջներն էլ ոչ թե կետային էին, այլ` ընդհանրական։ Նա ասաց, որ ղարաբաղա-ադրբեջանական շփման գծում ռազմական գործողությունները պետք է տանեն նրան, որ բոլորը համախմբվեն` թե՛ իշխանության, թե՛ ընդդիմության ներկայացուցիչները։ Սակայն այդ համախմբվածությունը նա տեսնում է իշխանության կողմից զիջումների տեսքով։
«Բոլորս պետք է ընդունենք, որ այսպես ապրել չի կարելի։ Եթե նպատակ ունենք ապահովել ադեկվատ պաշտպանություն Արցախի ու Հայաստանի համար, այսօր պետք է արմատապես բարեփոխենք ամբողջ համակարգը` քաղաքական, տնտեսական։ Ընտրական գործընթացներն այստեղ առաջնային դեր են խաղում։ Այլ կերպ ասած` իշխանությունը պետք է ընդառաջի սեփական հանրությանը»,- ասաց Լևոն Զուրաբյանը։
Նա ընդգծեց, որ ջանքերը պետք է մեկտեղել հանուն պետության անվտանգության համակարգի։
