ԵՐԵՎԱՆ, 27 ապրիլի — Sputnik. Հայաստանի հանրապետական կուսակցությունը գոյատևում է անդամավճարներով, լրագրողներին վստահեցրեց ԱԺ նախագահ Գալուստ Սահակյանը։
«ՀՀԿ–ում անդամավճարը ֆիքսված չէ: 1 դրամից մինչև ով ինչքան կկարողանա»,- ասաց ԱԺ նախագահը։
Նրա խոսքով` ինքն անձամբ ամեն ամիս 40 հազար դրամ է վճարում։
Մեկնաբանելով Վարդան Օսկանյանի այն հայտարարությունը, որ նոր կուսակցություն է ստեղծում, Գալուստ Սահակյանն ասաց, որր եթե ինքը մի օր կուսակցություն ստեղծեր, ապա չէր դիմի, որպեսզի իրեն փող տային:
«Այսինքն՝ պիտի նախևառաջ հնարավորություններ ունենաս, հետո նոր ստեղծես: Եթե պիտի ուրիշի ունեցվածքով մի բանը ստեղծես, կարծում եմ, դա հում պրոցես է»,- ասաց ԱԺ նախագահը՝ անդրադառնալով նախկին արտգործնախարար Վարդան Օսկանյանի այն հայտարարությանը, որ նորաստեղծ կուսակցությանն աջակցելու համար դիմելու է նաև բիզնեսմեններին:
Նշենք, որ երկարատև դադարից հետո Հայաստանի ԱԺ խոսնակ Գալուստ Սահակյանը ապրիլի 27-ին մասնակցեց խորհրդարանի նիստին։
Մարտի 14-ին խորհրդարանի խոսնակը կարճաժամկետ արձակուրդ էր մեկնել, որպեսզի բժշկական հետազոտություն անցնի արտասահմանյան կլինիկաներից մեկում։ 68-ամյա Գալուստ Սահակյանի առողջական վիճակը վատացել էր փետրվարի 17-ին, որից հետո նա ամբուլատոր բուժում էր ստացել Երևանի «Հերացի» առաջին համալսարանական հիվանդանոցում։ Նրա մոտ ախտորոշվել էր գլխուղեղի արյան շրջանառության անցողիկ խախտում։
