ԵՐԵՎԱՆ, 27 ապրիլի — Sputnik. Երկարատև դադարից հետո Հայաստանի ԱԺ խոսնակ Գալուստ Սահակյանը մասնակցել է խորհրդարանի նիստին։
ԱԺ նախագահը զբաղեցրել է իր տեղը նիստը սկսվելուց մի քանի րոպե անց։ Պատգամավորները նրա վերադարձը դիմավորել են ծափահարություններով։
«Մենք ողջունում ենք Ազգային ժողովի խոսնակ Գալուստ Սահակյանին»,- ասել է այդ պահին ելույթ ունեցող պետաիրավական հարցերի խորհրդարանական հանձնաժողովի նախագահ Հովհաննես Սահակյանը։
Մարտի 14-ին խորհրդարանի խոսնակը կարճաժամկետ արձակուրդի էր մեկնել, որպեսզի բժշկական հետազոտություն անցնի արտասահմանյան կլինիկաներից մեկում։ 68-ամյա Գալուստ Սահակյանի առողջական վիճակը վատացել էր փետրվարի 17-ին, որից հետո նա ամբուլատոր բուժում էր անցել Երրևանի «Հերացի» առաջին համալսարանական հիվանդանոցում։ Նրա մոտ ախտորոշվել էր գլխուղեղի արյան շրջանառության անցողիկ խախտում։
