ԵՐԵՎԱՆ, 26 ապրիլի — Sputnik. Պետք է հրաժարվել թուրքական ապրանքներ գնելուց և անբարյացակամ երկրում հանգստանալուց, Ազգային ժողովում ելույթի ժամանակ ասաց «Օրինաց երկիր» խմբակցության պատգամավոր Լևոն Դոխոլյանը։
«Թուրքիայից Հայաստան ներկրվում են ապրանքներ, իսկ հակառակ գործընթացը պաշտոնապես արգելված է։ Անտարբերությունը, պատմական հիշողության բացակայությունը, վտանգի հանդեպ անլուրջ վերաբերմունքը, որը բխում է մեր պատմական թշնամուց, դրանք այն գործոններն են, որոնք թույլ են տալիս թուրքական ապրանքներին խաղաղ գրավել Հայաստանը»,- ասաց Դոխոլյանը։
Նրա խոսքով` Ադրբեջանը և Թուրքիան սննդամթերքի օգնությամբ կարող են Հայաստանի դեմ կենսաբանական զենք կիրառել։ Ըստ նրա` յուրաքանչյուր հայ պետք է հասկանա, որ թուրքական ապրանք գնելով` սպառազինում է ադրբեջանական բանակը։
Թուրքական ապրանքները նետվեցին աղբարկղ>>
Պատգամավորը հիշեցրեց թուրք վարչապետի խոսքերն Ադրբեջանին լիակատար աջակցության մասին։
«Ես կարծում եմ, որ այս պահին ամենաիմաստուն քայլը կլինի թուրքական ապրանքների ներկրումն արգելելը, ինչը թույլ կտա զարգացնել նաև սեփական արտադրությունը։ Պետք է չեղյալ հայտարարել Երևան-Ստամբուլ-Երևան չվերթը, արգելել հայ զբոսաշրջիկներին մեկնել Թուրքիա»,- ասաց Դոխոլյանը։
Հայաստանի և Թուրքիայի միջև չկան դիվանագիտական հարաբերություններ, իսկ հայ-թուրքական սահմանը փակ է 1993թ.-ից պաշտոնական Անկարայի նախաձեռնությամբ։ Երկու երկրների միջև բարդ հարաբերությունների պատճառը, մասնավորապես, Անկարայի աջակցությունն է Ադրբեջանին ղարաբաղյան հարցում, ինչպես նաև Թուրքիայի սուր արձագանքը 1915թ.-ի Հայոց ցեղասպանության միջազգային ճանաչման գործընթացին։
