ԵՐԵՎԱՆ, 25 ապրիլի — Sputnik. ՀՀ նախագահ Սերժ Սարգսյանի կարծիքով` հրադադարի խախտում կարելի է համարել այն դեպքը, երբ մեկ կամ մի քանի կրակոց է հնչում, երբ օգտագործվում են նախկինում կիրառված զենքերը և այլն:
«Չորս օրվա ընթացքում կիրառվեցին խոշոր տրամաչափի և ավերիչ զենքեր, որոնցից են «Սմերչը», «ՏՕՍ»-ը, թուրքական զինատեսակներ և հրետանու բոլոր տեսակները: Ի՞նչ խախտման մասին կարող է խոսք լինել, եթե գործողություններին մի քանի հարյուր տանկ էր մասնակցում»,- Bloomberg գործակալությանը տված հարցազրույցում ասել է Սերժ Սարգսյանը:
Նա նաև ներկայացրել է գործողությունների զարգացման ընթացքը։
«Ռուսաստանի Գլխավոր շտաբի պետը զանգահարեց մեր Գլխավոր շտաբի պետին և ասաց, որ ադրբեջանական կողմը համաձայն է դադարեցնել ռազմական գործողությունները, դուք համաձա՞յն եք ամսի 5-ին ժամը 11-ի դրությամբ դադարեցնել ռազմական գործողությունները: Մինչ այդ Ադրբեջանի քաղաքական և ռազմական ղեկավարությունը երկու անգամ հայտարարել էր, որ պատրաստ են դադարեցնել ռազմական գործողությունները: Մեր Գլխավոր շտաբի պետը ուղևորվեց Մոսկվա, Մոսկվայում Հայաստանի, Ադրբեջանի և Ռուսաստանի Գլխավոր շտաբի պետերի հանդիպում եղավ, որտեղ զուտ բանավոր պայմանավորվածություն ձեռք բերվեց՝ չկրակել»,- ասել է Սարգսյանը
Նա նաև նշել է, որ Հայաստանն ասել է, որ ոչ թե պետք է հրադադար հաստատել, այլ վերականգնել հրադադարը, որի մասին համաձայնագիր էր կնքվել 1994 թվականին ու այդ համաձայնագիրն ամրապնդվել էր 1995 թվականին կնքված նոր համաձայնագրով:
«Ինչպես տեսնում եք, մինչև հիմա պահպանվում են այդ պայմանավորվածությունները, թեև խախտումները շարունակվում են: Բայց զորքերը հետ չեն տարվել, հրետանին ու տանկերը հետ չեն տարվել, և ամեն վայրկյան կարող է կրկնվել այն, ինչ տեղի ունեցավ: Գուցե՝ ավելի մեծ մասշտաբներով»:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
