ԵՐԵՎԱՆ, 24 ապրիլի — Sputnik. «100 կյանք» նախաձեռնության հիմնական իմաստն այն է, որ յուրաքանչյուր ոք մասնակցի փախստականների ու ընդհանրապես գլոբալ այլ խնդիրների լուծմանը։ Այս մասին «Ավրորա» մրցանակի համահիմնադիր Ռուբեն Վարդանյանն ասաց «Բանաձև» հաղորդաշարին տված հարցազրույցում։
Նրա խոսքով` «Ավրորա» մրցանակը ստեղծելիս փորձ արվեց հասկանալ մարդասիրության ինդեքսն ամբողջ աշխարհում:
Նա համոզված նշում է` եթե դու վերնախավի ներկայացուցիչ ես, պետք է պատասխանատվության զգացում ունենաս:
«Դու ուղղակի չես կարող ասել` գիտե՞ք, ես իմ գործն եմ անում ու չեմ ուզում ներգրավված լինել այլ գործերում: Աշխարհը շղթայված է, խնդիրները` փոխկապակցված: Հաստատ չես կարող ասել` այն, ինչ կատարվում է Դարֆուրում, միևնույն է ինձ համար: Իսկապես այդպես չէ»,- նշեց նա:
Այլ հարց է, որ յուրաքանչյուրն ինքն է որոշում իր մասնակցության և պատասխանատվության չափն ու ոլորտը, քանի որ մարդիկ տարբեր են, և տարբեր են նաև նրանց հետարքրքությունները, կարծում է Ռուբեն Վարդանյանը և նկատում, որ ինչպես 100 տարի առաջ, հիմա էլ նույն վայրում` Սիրիայում, բռնություններ են կիրառվում, միակ տարբերությունն այն է, որ եթե նախկինում դրանք իրականացվում էին քրիստոնյաների նկատմամբ, ապա հիմա` եզդիների։
Ռուբեն Վարդանյանը հույս հայտնեց, որ «Ավրորա» նախաձեռնությունը մեծ հաջողությամբ կպսակվի, որովհետև իրոք խիզախ մարդիկ են առաջադրված այդ մրցանակին։
