ԵՐԵՎԱՆ, 22 ապրիլի — Sputnik. Այս մասին Ամերիկայի Հայ դատի հանձնախմբին տեղեկացրել են ԱՄՆ նախագահին կից Անվտանգության ազգային խորհրդի պաշտոնատար անձինք:
«Ըստ էության, նախագահ Օբաման իր նախագահությունը կավարտի այնպես, ինչպես սկսել էր՝ զիջելով Թուրքիայի ճնշմանը և դավաճանելով իր խոստմանը՝ ասել ճշմարտությունը Հայոց ցեղասպանության մասին»,-Սպիտակ տան ներկայացուցիչների հետ հանդիպումից հետո ասել է Ամերիկայի Հայ դատի հանձնախմբի գործադիր տնօրեն Արամ Համբարյանը:
Նրա խոսքով` Հայոց ցեղասպանության հարցում Թուրքիայի ճնշմանը հակազդելու, ինչպես նաև Անկարայի և Բաքվի կողմից հակահայկական ագրեսիայի դեմ հանդես գալու հարցում Օբամայի ցանկության բացակայությունը շատ վտանգավոր է, քանի որ այդ որոշումը «դրդում է Էրդողանին և Ալիևին մեծացնել լարվածությունը և հայերի դեմ լայնամասշտաբ, արյունալի գործողություններ սկսելու իրական ռիսկ ստեղծել»:
ԱՄՆ-ն այն երկրներից է, որոնք դեռ պաշտոնապես չեն ընդունել Հայոց ցեղասպանությունը։ Թուրքական կառավարությունը շարունակում է հերքել ցեղասպանության փաստը և միլիոններ է ծախսում ԱՄՆ-ի պաշտոնական ճանաչմանը հակազդելու լոբբիստական ջանքերի համար։ Սակայն ԱՄՆ-ի 50 նահանգից 45-ը ճանաչել է Հայոց ցեղասպանությունը։
