ԵՐԵՎԱՆ, 21 ապրիլի — Sputnik. ՌԴ ԱԳ նախարար Սերգեյ Լավրովը Երևան է ժամանել երկօրյա այցով, որի ընթացքում բանակցություններ կունենա ՀՀ նախագահ Սերժ Սարգսյանի, ԱԳ նախարար Էդվարդ Նալբանդյանի հետ։
Բանակցությունների գլխավոր թեման կլինի ԼՂ հակամարտության կարգավորումը։
Ինչպես ավելի վաղ հայտնել էր ՌԴ ԱԳՆ պաշտոնական ներկայացուցիչ Մարիա Զախարովան, ՌԴ արտգործնախարար Սերգեյ Լավրովը ղարաբաղյան հակամարտության կարգավորման իր գաղափարները կներկայացնի Երևանում նախատեսված քննարկման ժամանակ։
Նրա խոսքով` խոսքը հակամարտությանը վերաբերող մշակումների, տարբեր գաղափարների քննարկման մասին է։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
