ԵՐԵՎԱՆ, 21 ապրիլի — Sputnik. Ռուսաստանի Դաշնության արտգործնախարար Սերգեյ Լավրովը Երևանում կլինի ապրիլի 21-22-ին։ Այցի ընթացքում որոշակի գաղափարներ կներկայացնի Լեռնային Ղարաբաղի հակամարտության կարգավորման համար, հայտնել է ՌԴ ԱԳՆ պաշտոնական ներկայացուցիչ Մարիա Զախարովան։
«Սերգեյ Լավրովը երբեք ոչ մի տեղ դատարկաձեռն չի մեկնում», — ասել է նա ճեպազրույցի ժամանակ` պատասխանելով ԶԼՄ-ների այն հարցին, թե արդյո՞ք ՌԴ ԱԳՆ ղեկավարը Երևան է ժամանում ԼՂՀ հակամարտության կարգավորման ծրագրով։
«Զախարովան նշել է, որ «ասել, թե սա ծրագիր է, նախագիծ կամ փաստաթուղթ, սխալ է»։»
«Խոսքը հակամարտությանը վերաբերող մշակումների, տարբեր գաղափարների քննարկման մասին է։ Միջնորդների դերը հենց դա է` բանակցել կողմերի հետ, քննարկել հնարավորությունները, լսել նրանց մտահոգություններն ու տարբերակներ առաջարկել հանգուցալուծման համար», — ասել է Զախարովան։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
