ԵՐԵՎԱՆ, 21 ապրիլի — Sputnik. Հայաստանը կարող է կամուրջ դառնալ Իրանի և ԵՏՄ-ի միջև տնտեսական կապերի հաստատման համար, այստեղ ակնհայտ կդառնա Երևանի համեստ, բայց կարևոր դերը, կարծում է Հայաստանի արդյունաբերողների և գործարարների միության նախագահ Արսեն Ղազարյանը։
Նա նշեց, որ Իրանը դեռ ամբողջությամբ չի ազատվել պատժամիջոցներից, իսկ Հայաստանը մի շարք երկրների հետ առևտրային արտոնությունների հնարավորություն ունի, ինչը բարենպաստ պայման է ստեղծում փոխշահավետ համագործակցության համար։
Նրա խոսքով` պատահական չէ, որ «Invest Armenia» բիզնես ֆորումի հիմնական թեման կլինի Հայաստան-Իրան-ԵՏՄ համագործակցությունը։
«Որքան էլ բազմաթիվ վերլուծաբաններ քննադատեն ԵՏՄ-ն, արդեն վերլուծությունը ցույց է տալիս, որ հետընթացից դուրս գալուց հետո այս շուկան զարգացման մեծ ներուժ կունենա», — ասաց Ղազարյանը։
Ինչպես լրագրողներին ասաց «Invest Armenia» բիզնես ֆորումի համակարգող Վրույր Փենեսյանը, ֆորումի հիմնական թեման կլինի Հայաստանի, Իրանի և ԵՏՄ-ի գործակցության զարգացումը։ Ֆորումի մասնակիցները կուսումնասիրեն նաև Հայաստան ներդրումների ներգրավման հարցը` ներառյալ 2016-2018 թվականների տնտեսական կանխատեսումները։ Ֆորումին կմասնակցի ԵՏՄ երկրներից, Հայաստանից և Իրանից մոտ 250 գործարար։
Կներկայացվի նաև արտասահմանյան կապիտալով հաջողակ ընկերությունների փորձը, որոնք Հայաստանում սկսել են գործել վերջերս։
Հայաստանն ու Իրանը համագործակցում են հիմնականում էներգետիկայի ոլորտում։ Արդյունավետ համագործակցություն է տարվում նաև տրանսպորտի, բնապահպանության, առողջապահության, գյուղատնտեսության, գիտության, կրթության և մշակույթի ոլորտներում։ Հայաստանը ԵՏՄ անդամ է 2015 թվականի հունվարի 2-ից, այն ԵՏՄ կազմում Իրանի հետ սահմանակից միակ երկիրն է։
