Sputnik Արմենիայի թղթակից Լաուրա Սարգսյանը կապվել է Ռուսաստանի գյուղատնտեսության նախկին նախարար, ագրարային քաղաքականության միջազգային անկախ ինստիտուտի ղեկավար Ելենա Սկրիննիկի հետ։
-Հայ գործարարները հայ-ռուսական լոլիկ արտահանելիս սահմանին բախվում են այն խնդրի հետ, որ նրանց թույլ չի տրվում ապրանքն անցկացնել, որովհետև կասկած կա, որ դրանք կարող են լինել թուրքական արտադրության։ Ինչպե՞ս կմեկնաբանեք այս հարցը։
— Եթե ուշադիր նայեք Հայաստանում լոլիկի արտադրության, ինչպես նաև դրա սպառման ծավալներին, ապա առկա է տարբերություն։ Հենց այդ տարբերությունը լոլիկի այն ծավալն է, որը կարող է իրացվել, մասնավորապես Ռուսաստանի տարածքում։ Եթե ուրիշ այլ ապացույցներ չկան, որ դրանք թուրքական լոլիկներ են, ապա դրանք կարող են իրացվել Ռուսաստանի տարածքում։
- Երկրների միջև գյուղատնտեսության ոլորտում առկա՞ է սերտ գործընկերություն։
— Հայաստանի և Ռուսաստանի միջև առկա գործընկերությունը կարելի է ներկայացնել մի քանի ուղղություններով` առևտրային գործընկերություն` 1,5 մլրդ դոլար ապրանքաշրջանառությամբ։ Ռուսաստանը նաև Հայաստանի խոշորագույն առևտրային գործընկերն է` մինչև 30 տոկոս արտաքին ապրանքաշրջանառության մասնաբաժնով։ Հայաստանից Ռուսաստան արտահանումը կազմում է 250 մլն դոլար կամ 80 տոկոս։
Ինչ վերաբերում է ռուսական ներդրումներին, մեզ մոտ հիանալի աշխատում է ձեռնարկություն, որը համատեղ արտադրություն է իրականացնում Արարատի պահածոների գործարանի հետ։ Իրականացվում են նախագծեր էներգետիկայի, հաղորդակցության, երկաթուղիների, լեռնահանքային արդյունաբերության ոլորտներում։ Ռուսական կողմից հարյուրավոր միլիոն դոլար է ներդրվել Հայաստանի տնտեսության մեջ։
2010թ.-ին Ռուսաստանից Հայաստան է առաքվել հինգ հազար տոննա ցորեն` որպես մարդասիրական օգնություն, և մեկ միլիոն տոննա բուսական յուղ։ Մենք աջակցել ենք նաև դպրոցական կաթի և դպրոցական սննդի ծրագրին։ Գործարկվել է նաև Հայաստանին հինգ միլիոն դոլար տրամադրելու մասին նախագիծը` համալիր աջակցության և գյուղական տարածքների զարգացման համար։
-Դրանք ապագայի՞ն ուղղված ծրագրեր են։
— Գյուղատնտեսության զարգացման նախագծերը մեծ ապագա ունեն` կապված նրա հետ, որ եվրոպական երկրների հետ հատուկ տնտեսական միջոցների արդյունքում մենք պետք է ավելացնենք գյուղատնտեսական շրջանառության ծավալները։ Ռուսաստանի նախագահ Վլադիմիր Պուտինի վերաբերմունքը բարեհաճ է, և նա շնորհակալություն է հայտնել Հայաստանի նախագահ Սերժ Սարգսյանին` ռուսական ներդրողներին աջակցելու համար։
-Ի՞նչ նշանակություն ունի էներգետիկայի ոլորտում քառակողմ (Հայաստան, Վրաստան, Իրան, Ռուսաստան) նախագիծը։
— Այդ նախագիծը պետք է զարգացնել։ Դա մեր երկրների միջև համագործակցության կարևորագույն ուղղություններից մեկն է։ Ցանկանում եմ նշել, որ ռուսական շուկան ոչ միայն գյուղատնտեսության ոլորտում, այլև Հայաստանի տնտեսության զարգացման համար կարող է շարժիչ ուժ դառնալ, առավել ևս մեր հարաբերությունները կրում են երկարաժամկետ և դրական բնույթ։
-Ի՞նչ կարող է Հայաստանին տալ Ռուսաստանը։
— Գոյություն ունեն գյուղատնտեսական արտադրանքը Ռուսաստան առաքելու հսկայական հնարավորություններ, և այդ ծավալները կարող են բազմապատկվել, իսկ ինչպես հայտնի է, հայկական գյուղատնտեսական արտադրանքը Ռուսաստանում պահանջված է և տարածված։
-Ի՞նչ է անում Մոսկվան հայկական արտադրանքը Ռուսաստանում և ԵՏՄ երկրներում տարածելու ուղղությամբ։
— Առաջին հերթին` շատ բան արված է։ Չեն կիրառվում մաքսատուրքեր և տնտեսական բնույթի սահմանափակումներ։ Այդ ամենն ուղղված է ապրանքի իրացման ծավալների ավելացմանը։ Ռուսաստանին և Հայաստանին կապում են շատ սերտ փոխշահավետ հարաբերություններ, մասնավորապես գյուղատնտեսության ոլորտում։ Եվ եթե հայկական արտադրանքը որակյալ է, ապա դրա իրացման հնարավորությունները շատ մեծ են։
