ԵՐԵՎԱՆ, 20 ապրիլի — Sputnik. Բագրատ Էստուկյանը նշեց, որ վերսկսված դատավարությունը կարևոր է նրանով, որ առաջին անգամ պետք է քննվի Հրանտ Դինքի սպանության մեջ պետական բարձրաստիճան պաշտոնյաների ունեցած դերակատարությունը:
«Այս 26 մարդիկ նախապես փաստաբանների կողմից նշվել էին հարցաքննվելու համար, բայց պետությունը միշտ դեմ էր եղել, չէր արտոնել հարցաքննել նրանց։ Սակայն հիմա դա հնարավոր է»,- հայտնեց Էստուկյանը։
«Մենք առաջին իսկ պահից ցույց տվեցինք, որ սա պետական գործ է, ոչ թե անհատական: Եվ հիմա գործում այս պաշտոնյաներին ներգրավելու շնորհիվ մեր իրավացիությունը կարող է երևալ։ Դատվողները բարձրաստիճան ոստիկաններ, ոստիկանապետեր ու անվտանգության աշխատակիցներ են, հետևաբար շատ կարևոր է այս դատավարությունը»- ընդգծեց Էստուկյանը:
«Ակոսի» խմբագրապետը նշեց, որ արդարություն չի սպասում, բայց սա, անշուշտ, առաջընթաց է:
Նշենք, որ դատական նիստը պետք է շարունակվի նաև հինգշաբթի։
Հրանտ Դինքն օրը ցերեկով գնդակահարվել էր 2007-ի հունվարի 19-ին Ստամբուլի Շիշլի թաղամասում իր թերթի՝ «Ակոսի» խմբագրության մուտքի մոտ։
