ԵՐԵՎԱՆ, 18 ապրիլի — Sputnik. Հայաստանյան ջերմոցներում աճեցված լոլիկով բեռնված երկու բեռնատար ավտոմեքենա այս պահին կանգնած է Ռուսաստանի սահմանին։ Այդ երկրի մաքսային ծառայության աշխատակիցներն արգելում են բեռների ներկրումը. նրանք ցանկանում են համոզվել, որ լոլիկն իրոք հայկական ծագում ունի։
«Մեզ ասացին, որ մեր ապրանքից նմուշներ պետք է ուղարկեն Մոսկվա` փորձաքննության, որպեսզի պարզեն` դա հայկական է, թե ոչ»,- Sputnik Արմենիային հայտնեց ընկերության գործադիր տնօրեն Արմեն Սարգսյանը` հավելելով, որ թեև համաձայնել են փորձաքննության առաջարկին, բայց և գիտակցում են, որ դա նշանակում է կամավոր հրաժարվել սեփական արտադրանքից։
«Դա հավասարազոր է, որ այդ ապրանքը թափենք, որովհետև փորձաքննության ամբողջ գործընթացը 10-12 օր է տևում, իսկ մեր ապրանքը շուտ փչացող է, չի կարող այդքան մնալ ավտոմեքենայի մեջ, հատկապես այսքան ճանապարհն անցնելուց հետո»,-ասաց մեր զրուցակիցը` նշելով, որ որևէ այլ պատճառաբանություն ռուսական կողմը հայ ներկրողին չի ներկայացրել։
Հայկական գյուղմթերքի նկատմամբ ռուսական կողմի անվստահության ոչ պաշտոնական պատճառն, ըստ որոշ աղբյուրների, Թուրքիայի դեմ Ռուսաստանի կիրառած պատժամիջոցներն են, որոնցով 2016թ-ի հունվարի 1-ից արգելվել է թուրքական միրգ-բանջարեղենի, այդ թվում` լոլիկի ներմուծումը Ռուսաստան։ Մինչ այդ Ռուսաստան լոլիկի ամենախոշոր մատակարարը Թուրքիան էր, որն ապահովում էր պահանջարկի 50 տոկոսը։
Հայաստանցի գործարարը Sputnik Արմենիայի հետ զրույցում հայտնեց, որ նման խնդրի հետ են բախվել նաև խնձոր արտահանող հայ գործարարները։ Իր ղեկավարած ընկերությունն այդ խնդրով դիմել է ՀՀ-ում ՌԴ դեսպանատուն, Առևտրային ներկայացուցչություն, Մաքսային ծառայության ղեկավարին, ԵԱՏՄ համապատասխան մարմիններին, առաջարկել այցելել, տեսնել ջերմոցային տնտեսությունն ու համոզվել, որ ռուսական սահմանին կանգնած լոլիկն, իրոք, աճեցված է Հայաստանում։
«Հիմա մեր երկու բեռնատար ավտոմեքենաները կանգնած են սահմանին, լոլիկներից փորձանմուշները վերցված են, սպասում ենք պատասխանի, բայց մինչ այդ գործընթացի ավարտը մենք մեծ ռիսկ ունենք այդ ամբողջ ապրանքը կորցնելու»,- ասաց Արմեն Սարգսյանը։
Ի դեպ, այս օրերին Հայաստանից ընկերության ևս երկու ավտոմեքենա է ուղևորվել ՌԴ` հուսով, որ փորձաքննության ավարտին ներմուծման խոչընդոտ այլևս չի լինի։
