ԵՐԵՎԱՆ, 14 ապրիլի — Sputnik. Խորհրդարանական փոքրամասնության պատգամավոր Սամվել Պետրոսյանը դիմել է Վրաստանի իշխանություններին` կոչ անելով ճանաչել Հայոց ցեղասպանությունը, հայտնում է Sputnik Գրուզիան։
«Համոզված եմ, որ եթե ժամանակին դատապարտվեր Հայոց ցեղասպանությունը, աշխարհի տարբեր ծայրերում նման ողբերգություններ չէին լինի։ Ուզում եմ կոչ անել բոլորին` ճանաչել և դատապարտել հայերի նկատմամբ գործած ցեղասպանությունը, այդպիսով վերականգնել պատմական արդարությունը», — խորհրդարանի լիագումար նիստի ժամանակ ասել է Պետրոսյանը։
Ի պատասխան` խորհրդարանական մեծամասնության առաջնորդ Զվիադ Կվաչանտիրաձեն հիշեցրել է Ղարաբաղի հակամարտության մասին և պատգամավորներին կոչ արել սադրանքների չտրվել։
«Վերջերս Կովկասում մեծ, խորը և քնած հակամարտությունը փորձեցին կրկին ակտիվացնել։ Բարեբախտաբար, միջազգային ջանքերով այս փուլում հակամարտության լուրջ բռնկման հեռանկարներ չկան, սակայն մենք միշտ պետք է հիշենք, որ մեզ շրջապատում են ուժեր, որոնք շահագրգռված են, որ Կովկասում մշտական պատերազմ լինի և դրանում ներառվեն Հարավային Կովկասի բոլոր երկրները», — հայտնեց Կվաչանտիրաձեն։
Վրաստանը պետք է բարիդրացիական հարաբերություններ պահպանի ինչպես Հայաստանի և Ադրբեջանի, այնպես էլ էթնիկ հայերի և ադրբեջանցիների, որոնք բնակվում են Վրաստանում։ Այդ իսկ պատճառով կարևոր է, որ Վրաստանը չեզոք դիրք գրավի, կարծում է փորձագետ Նիկա Չիտաձեն։
«Հայոց ցեղասպանության ճանաչումը չպետք է օրակարգում լինի։ Քանի որ դա կարող է դժգոհություն առաջացնել Ադրբեջանի և Թուրքիայի կողմից, որոնք Վրաստանի գործընկերներն են։ Բացի այդ անհրաժեշտ է հաշվի առնել, որ երկրի բնակչության 5 տոկոսն էթնիկ ադրբեջանցիներն են, իսկ 10 տոկոսը` իսլամ դավանողները», — Sputnik-ին է ասել փորձագետը։
Օսմանյան կայսրությունում Հայոց ցեղասպանության փաստն այսօր ճանաչել են մի շարք պետություններ, ինչպես նաև Եվրախորհրդարանն ու եկեղեցիների համաշխարհային խորհուրդը։ Խոսքը XIX դարի վերջի XIX դարի սկզբի իրադարձությունների մասին է, երբ Օսմանյան Թուրքիայում ավելի քան 1.5 մլն հայ սպանվեց։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
ՌԴ պետդուման 1995 թվականին որոշում է կայացրել «Դատապարտել իր պատմական հայրենիքում` Արևմտյան Հայաստանում 1915-1922 թվականների Հայոց ցեղասպանությունը»։
