ԵՐԵՎԱՆ, 14 ապրիլի — Spuntik. ՌԴ նախագահ Վլադիմիր Պուտինը նշեց, որ Ղարաբաղյան հիմնախնդիրը նուրբ թեմա է, որին պետք է մոտենալ բժշկական հայտնի` չվնասելու սկզբունքով։ Նրա համոզմամբ` դա սառեցված հակամարտություն էր, որն անսպասելիորեն բռնկվել է։
«Մի քանի տարի առաջ մեզ, իմ կարծիքով, հաջողվել էր մոտենալ փոխզիջումային տարբերակին, բայց պարզվեց, որ դա, ցավոք, այդպես չէր։ Մենք ամեն ինչ կանենք կողմերի համար երկուստեք ընդունելի երկարաժամկետ լուծում գտնելու համար»,- ասաց նա։
Պուտինը հավաստիացրեց, որ ՌԴ-ն շարունակելու է ԼՂ կարգավորման ուղղությամբ աշխատել երկկողմ համագործակցության և միջազգային կառույցների շրջանակներում` վստահեցնելով, որ Ռուսաստանը շահագրգռված է խնդրի լուծմամբ։ «Մենք ցանկանում ենք լիարժեք աշխատել ինչպես Ադրբեջանի, այնպես էլ Հայաստանի հետ»,- ասաց նա։
«Չնայած ողբերգական իրադարձություններին` հայերն ու ադրբեջանցիները շարունակում են պահպանել ջերմ միջանձնային հարաբերություններ»,- ասել է Պուտինը`վստահեցնելով, որ ՌԴ-ն շարունակելու է իր համեստ ներդրումն ունենալ ԼՂ հակամարտության կարգավորման գործում։ Այդուհանդերձ, ՌԴ նախագահի դիտարկմամբ, վերջին խոսքն այնուամենայնիվ պատկանում է հայ և ադրբեջանցի ժողովուրդներին։
