ԵՐԵՎԱՆ, 9 ապրիլի- Sputnik. Ռուսաստանի վարչապետ Դմիտրի Մեդվեդևը հայտարարել է, որ անհնար է թաքցնել Լեռնային Ղարաբաղում զորքերի տեղաշարժը:
«Հիմա անհնար է որևէ բան թաքցնել: Վաղ թե ուշ այս կամ իրադարձության մասին ճմշարտությունը ջրի երես է դուրս եկել: Իսկ հիմա այդ ամենն ակնհայտորեն հսկվում է նաև արբանյակների և հսկողության այլ միջոցների օգնությամբ»,- «Вести в субботу» ծրագրին տված հարցազրույցում ասել է Մեդվեդևը՝ պարզաբանելով, թե արդյո՞ք ռուսական արբանյակներն արձանագրել են զորքերի տեղաշարժը ղարաբաղյան հակամարտության գոտում:
Խոսելով Երևան և Բաքու կատարած իր այցերի նպատակների մասին՝ Մեդվեդևը նշել է, որ գլխավորը «հանդարտվելու, կրակը դադարեցնելու» անհրաժեշտությունը ցույց տալն է եղել:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
