ԵՐԵՎԱՆ, 13 ապրիլի-Sputnik. Գոհար Սարգսյան. Հաշվիչները պտտվում են նույնիսկ այն դեպքում, երբ տանտերերն ամիսներով քաղաքում չեն։ Բնակիչների բողոքը տեղ հասցրեց ԱԺ պատգամավոր Էդմոն Մարուքյանը։ Նա առաջարկեց բացառել մարդկային գործոնը` Հայաստանում տեսուչների ինստիտուտը գնահատելով որպես խնդրահարույց։
«Հետ ու առաջ տալու խնդիրն առկա է։ Ես կարծում եմ, որ դա կարգավորված չլինելու և անպատասխանատու մոտեցման արդյունք է, չեմ կարծում, որ ընկերությունը միտումնավոր է արել։ Դա տեսուչների մակարդակում արվող բան է։ Մենեջմենթի հարց է, երբ ներքևի խնդիրը վերևում չեն իմանում»,-ասաց Էդմոն Մարուքյանը։
Ի պատասխան` ՀԷՑ-ի գլխավոր տնօրեն Կարեն Հարությունյանն ասաց, որ ամեն ինչ կարվի բաժանորդների վնասը փոխհատուցելու համար։ Նա չթաքցրեց, որ տեխնիկական խնդիրներ կան, և դրանց լուծման համար ժամանակ խնդրեց։
«Ժամային գրաֆիկների ճշտումներ անում ենք։ Մեզ տրված ժամկետում կավարտենք։ Յուրաքանչյուր դեպք կդիտարկվի անհատական։ Այնպես չէ, որ բոլորի ժամերը հետ կամ առաջ են ընկել, համոզված եմ, որ 80 տոկոսը ճիշտ է աշխատել։ Բոլոր հաշվիչների ժամային գրաֆիկները ճշգրտվելու են»,-ասաց ՀԷՑ-ի գլխավոր տնօրենը։
Էդմոն Մարուքյանն էլ հասարակությանը հորդորեց իր իրավունքների խախտման դեպքում չդիմել դատարան, քանի որ դրա համար պետք է ամիսներով սպասել ու պետտուրք վճարել։ Փոխարենն առաջարկեց դիմել ՀԾԿՀ, որը կպարտավորեցնի համապատասխան մարմնին փոխհատուցում տրամադրել։
Մարուքյանն անհեթեթ է համարում նաև հաշվիչների` տարին մեկ անգամ ստուգումը, քանի որ այդ դեպքում խախտումներն ավելի շատ են լինում։
Մարուքյանի հաջորդ դժգոհությունը վերաբերում է ՀԷՑ-ին 5 միլիոն դրամով տուգանելուն։ Նա կարծում է, որ այն պետք է կրկնապատկել, քանի որ 5 միլիոնը ՀԷՑ-ի նման ընկերության համար ոչինչ է։ Հանրային ծառայությունները կարգավորող հանձնաժողովի նախագահ Ռոբերտ Նազարյանը հակադարձեց այս դիտարկմանը։
«Դա ոչ թե ֆինանսական պատժամիջոց է, այլ խնդրի վրա ուշադրություն հրավիրելու եղանակ։ Կարող էինք բավարարվել զգուշացմամբ, երկրորդ խախտման դեպքում ավելի մեծ գումար սահմանել։ Կարծում եմ, որ այս տարբերակը ճիշտ է»,-ասաց Նազարյանը։
Սպառողները բարձրացնում են մի կարևոր խնդիր ևս։ Եղել են դեպքեր, երբ բազմաթիվ քաղաքացիներ շարունակում են գիշերային ժամերի փոխարեն վճարել ցերեկային սակագին` 10 դրամով ավելի։ Հոկտեմբերից մարտն ընկած ժամանակահատվածում գիշերային սակագին վճարվում է ժամը 22։00-ից մինչև 6։00, իսկ մարտից հոկտեմբեր` 23։00-ից մինչև 7։00։
