ԵՐԵՎԱՆ, 12 ապրիլի — Sputnik. Ամերիկացի տիեզերագնաց Ջեյմս Բաղյանը` տիեզերքը նվաճած առաջին հայը, նախնիների հողի վրայով անցնելիս 1989 թվականին սրտագին բարևներ ուղարկեց իր ժողովրդին, հայտնեց Barev.today-ը։
«Իմ ժողովուրդ, իմ նախնիների երկիր, դուք միշտ իմ սրտում եք: Մաղթում եմ ձեզ երջանկություն, հաջողություն և բարգավաճում»,- ասված էր հայերեն գրված նրա հաղորագրության մեջ։
Ջեյմս Բաղյանը ծնվել է 1952 թվականի փետրվարի 22-ին Ֆիլադելֆիա քաղաքում։ Ջեյմսի պապը ծնունդով Տրապիզոնից էր, ավելի ուշ տեղափոխվել էր Ղարաբաղ։ Հետագայում ընտանիքը տեղափոխվել էր ԱՄՆ։
Դպրոցն ապագա տիեզերագնացը ավարտել է հարազատ Ֆիլադելֆիայում, ինչից հետո ուսումը շարունակել Դրեքսելի համալսարանում և ստացել ինժեներ-մեխանիկի որակավորում։ Ավիացիայի նկատմամբ սերը Բաղյանի մոտ հանկարծակի չի հայտնվել. ապագա տիեզերագնացի հայրը` Ֆիլիպ Բաղյանը, օդաչու էր և Երկրորդ համաշխարհային պատերազմի տարիներին ԱՄՆ ԶՈՒ-ում ծառայող ամերիկաբնակ հայերի հետ միասին ակտիվ մասնակցություն էր ցուցաբերում ռազմական գործողություններին։ Օդաչուի խիզախ գործողությունները բարձր գնահատականի արժանացան. մայոր Բաղյանին պարգևատրեցին ամերիկյան «Արծաթե խաչ» շքանշանով։
Ինքը` Ջեյմսը, 22 տարեկանից մասնակցում էր մի շարք ավիացիոն մրցումների։ 1976-1978 թվականներին Մերիլենդ նահանգում աշխատում էր ԱՄՆ Ռազմածովային ուժերի փորձառական կենտրոնում։ Նրա գործունեությունն այնքան արդյունավետ էր, որ նա մի քանի ինժեներական բացահայտումներ արեց։ Այնուհետև նա զբաղվում էր տիեզերական կենսաբանության և բժշկության խնդիրներով։
Արդեն 1977 թվականին ավարտեց Թոմաս Ջեֆերսոնի համալսարանն ու ստացավ բժշկական գիտությունների դոկտորի աստիճան և մեկ տարի անց սկսեց աշխատել որպես վիրաբույժ, միաժամանակ Լինդոն Ջեքսոնի անվան տիեզերական կենտրոնում զբաղվում էր բժշկական հետազոտություններով` զուգահեռաբար կրթություն ստանալով աերոտիեզերական բժշկության դպրոցում։
Բաղյանի երկրորդ թռիչքն արդեն տեղի ունեցավ 1991 թվականին «Կոլումբիա» տիեզերանավով։ ԱՄՆ-ում Բաղյանը հայտնի է Բեյջին ազգանունով։ ԱՄՆ ՌՕՈԻ գնդապետը մի շարք պարգևների ու մրցանակների է արժանացել։ Բաղյանի կենսագրությանը կարելի է ծանոթանալ NASA-ի կայքում։
