ԵՐԵՎԱՆ, 12 ապրիլի — Sputnik. Չնայած անվտանգության աշխատակիցների զգուշացումներին` հայ մարզիկները Սամսունում կրում են "Armenian Boxing Team" գրությամբ մարզահագուստ, հայտնում են Հայաստանի բռնցքամարտի ֆեդերացիայից։
Ըստ հաղորդման` հենց այդ գրությամբ մարզահագուստով են մարզիկները մարզիչների ուղեկցությամբ մոտենում ռինգին:
«Հավաքականի մարզիկներից շատերը Թուրքիայում կամ Ադրբեջանում մրցումների մասնակցության փորձ ունեն, և նմանատիպ ճնշումները պետք է որ խոչընդոտ չհանդիսանան մեր մարզիկների համար, նրանք կկարողանան շարունակել պայքարը նույն ոգով»,- ասված է հաղորդագրությունում:
Ապրիլի 12-ին ռինգ դուրս կգա Հայաստանի 4 ներկայացուցիչ` 56 կգ քաշային կարգում Արամ Ավագյանը կմենամարտի Գերմանիան ներկայացնող Էլ-Հագ Օմարի հետ, 69 կգ քաշային կարգում Վլադիմիր Մարգարյանը` Բուլղարիան ներկայացնող Սիմեոն Չամովի հետ, 75 կգ քաշային կարգում Արման Հովհիկյանն իր 2-րդ մենամարտում կմրցի Հունգարիան ներկայացնող Զոլտան Հարչսայի հետ, իսկ 81 կգ քաշային կարգում Նիկոլ Արությունովը` սլովակ Մատուս Ստրինսկոյի հետ:
