ԵՐԵՎԱՆ, 9 ապրիլի — Sputnik. Ադրբեջանի կողմից ԼՂ խաղաղ բնակիչների ու զինվորների նկատմամբ իրականացված անմարդկային բռնությունների մասին հարցին պատասխանելով` ԵԱՀԿ ամերիկացի համանախագահ Ջեյմս Ուորլիքը նշեց. «Մենք տեսել ենք լուսանկարները, մտահոգված ենք»։
«Մենք խիստ մտահոգված ենք մարդու իրավունքների բոլոր խախտումների մասին հաղորդումներով»,- ասաց նա` միաժամանակ հայտնելով, որ այդ հարցով հանդիպել են Կարմիր Խաչի միջազգային կոմիտեի ներկայացուցիչների հետ, խնդրել ճշգրտել, թե ինչ է տեղի ունեցել:
Նրա խոսքով` այս հարցն իրենք բարձրացրել են կողմերի մայրաքաղաքներում:
Իսկ ռուսաստանցի համանախագահ Իգոր Պոպովը, պատասխանելով ԼՂՀ-ի` որևէ կարգավիճակով Ադրբեջանի կազմում ընդգրկվելու անհնարինության մասին հայ լրագրողների դիտարկմանը, ասաց. «Այս պահին այդ թեման բանակցությունների առարկա է»:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։
Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
