ԵՐԵՎԱՆ, 9 ապրիլի — Sputnik. Ռուսաստանցի համանախագահ Իգոր Պոպովը կարգավորման առաջարկների հիմնական 6 բաղադրիչներից առանձնացրեց հատկապես երկուսը` տարածքների վերադարձի և ԼՂ կարգավիճակի որոշման հարցերը։ Ընդ որում` այս երկու հարցերը, Պոպովի խոսքով, պետք է դիտարկվեն իբրև մեկ միասնական, հավասարազոր խնդիր։
«Հենց այս սկզբունքների մասին էր այսպես կոչված Լավրովի փաստաթուղթը»,- ասաց Պոպովը։
Հաջորդ բաղադրիչներն են փախստականների վերադարձի, ԼՂ-ն Հայաստանին կապող միջանցքի լայնության և կարգավիճակի, ինչպես նաև խաղաղապահ առաքելության մասին առաջարկները։ Ընդ որում վերջինը նախատեսվում է քննարկել խնդրի կարգավորման վերջնական փուլում, այն բանից հետո, երբ կստորագրվի խաղաղության համաձայնագիրը։
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
