ԵՐԵՎԱՆ, 9 ապրիլի — Sputnik. Ռուսաստանի վարչապետ Դմիտրի Մեդվեդևը չի բացառել Լեռնային Ղարաբաղի իրավիճակում արտաքին ազդեցությունը և «թուրքական գործոնի» դերը:
Մեդվեդևի խոսքով` կան մի շարք ուժեր, որոնք հետևում են ղարաբաղյան հակամարտության հետևանքներին և Մերձավոր Արևելքի իրավիճակի վրա դրանց ազդեցությանը և հակառակը։
«Որովհետև բոլոր հակամարտություններն այսպես թե այպես որոշակի փուլում կարող են կապված լինել քաղաքական որոշման հետ: Ուստի ես չեմ բացառում, որ այս դեպքում գոյություն ունեն գործոններ, որոնք դրսից ազդում են այդ հակամարտության վրա:Դուք նշել եք թուրքական գործոնը: Հավանաբար այդ թուրքական գործոնը կա թեկուզ այն պատճառով, որ Թուրքիան արտահայտել է իր դիրքորոշումը»,- ասել է Մեդվեդևը «Вести в субботу» ծրագրին տված հարցազրույցում:
Նա նաև նշել է, որ զենքը, որը ձեռք են բերում Հայաստանը և Ադրբեջանը, պետք է զսպելու գործոն լինի, այլ ոչ թե բռնության:
«Ես կարծում եմ, որ զենքը կարող է և պետք է ձեռք բերվի ոչ միայն նրա համար, որպեսզի այն ինչ-որ ժամանակ օգտագործվի, այլ նրա համար, որպեսզի այն լինի զսպող գործոն, և ահա այս պահը պետք է գնահատեն հակամարտության կողմերը»,- ասել է Մեդվեդևը՝ պատասխանելով Հայաստանի և Ադրբեջանի զինվածության աստիճանի մասին հարցին:
ՌԴ վարչապետը նշել է, որ Ռուսաստանը գործընկեր երկիր է երկու պետությունների համար, իսկ Հայաստանի համար հանդես է գալիս նաև որպես ՀԱՊԿ դաշնակից: Նրա խոսքով՝ երկրների միջև հարաբերությունները նույնպես հիմնված են համաձայնությունների վրա, այդ թվում՝ ռազմատեխնիկական ոլորտում:
«Ուստի եթե մենք մի րոպե պատկերացնենք, որ Ռուսաստանը հրաժարվել է այս դերից (մենք հիանալի հասկանումենք, որ այդ տեղը դատարկ չի մնա), զենք կգնեն այլ երկրներից, դրա մահաբերության աստիճանը դրանից չի նվազի: Բայց միաժամանակ կարող է խախտվել գոյություն ունեցող հավասարակշռությունը՝ կապված այն բանի հետ, որ մենք հասկանում ենք, թե ինչպիսին են մեր գործընկերների պահանջները, և բոլորը պատկերացնում են տարածաշրջանում ուժերի դասավորությունը»,- ասել է Մեդվեդևը:
