ԵՐԵՎԱՆ, 4 ապրիլի — Sputnik. Ադրբեջանը նման պրակտիկա ունի, երբ օգտվում է վարձկաններից հատկապես մի շարք կարևորագույն զորատեսակներում, մասնավորապես ռազմաօդային ուժերում, ասում է Լևոն Հովսեփյանը։
«Այնպիսի ոլորտներում, որոնք բարձր պրոֆեսիոնալիզմ են պահանջում, Ադրբեջանն օգտվում է արտասահմանցի մասնագետներից»,- նշեց փորձագետը` ավելացնելով, որ խոսքը վերաբերում է նաև ադրբեջանական բանակում օտարերկրյա պետությունների ներկայությանը։
Նրա խոսքով` այս համատեքստում Թուրքիան կարևոր դերակատարություն ունի, իսկ Թուրքիայի ԶՈՒ գլխավոր շտաբի ազդեցությունը և վերահսկողություն մեծ է Ադրբեջանում։
«Պետք է նկատի ունենալ, որ Ադրբեջանի ռազմաքաղաքական ղեկավարությունը չէր գնա նման լայնածավալ գործողությունների ծրագրման` առանց դրանք Անկարայի հետ համաձայնեցնելու»,- նշեց թուրքագետը։
Ադրբեջանական բանակում թուրքական բարձրագույն սպայական կազմի հրահանգիչների դերակատարությունը մեծ է, օպերատիվ պլանավորումը նախատեսված է իրավապայմանագրային հիմքով` Ադրբեջանի և Թուրքիայի միջև 2010թ.-ի օգոստոսին կնքված փոխօգնության համաձայնագրով։
«Սա նորություն չէ, և մենք հաճախ ենք ադրբեջանական զինված ուժերի դիվերսիաների ժամանակ բացահայտում դիվերսանտների, որոնք պատրաստություն են անցել Թուրքիայում»,- ասաց Հովսեփյանը` նշելով, որ հատկապես Ադրբեջանի հատուկ նշանակության ուժերը պատրաստվում են թուրքական հրահանգիչների կողմից։
Նրա խոսքով` ինչպես Ադրբեջանի տարածքում, այնպես էլ Թուրքիայի տարածքում կան մի շարք ճամբարներ, որտեղ իրականացվում է նրանց պատրաստությունը։ «Համենայն դեպս Թուրքիան իր տարբեր քայլերով`ինչպես հայտարարությունների մակարդակում, այնպես էլ պրակտիկ գործողություններով նպաստում է հակամարտության թեժացմանը։ Թուրքիայի ցանկացած դերակատարություն միայն ավելի բարդացնում է իրավիճակը»,- ասաց թուրքագետը` եզրափակելով, որ մենք վստահում ենք հայկական զինված ուժերին, որոնք իրականացնում են անհրաժեշտ պատժիչ գործողություններ` հակառակորդին սանձահարելու համար։
