ԵՐԵՎԱՆ, 31 մարտի — Sputnik. Մեղրիի և Ագարակի բնակիչներն այս տարեվերջից կսկսեն իրանական գազ սպառել: Այս մասին այսօր կառավարությունում հայտարարեց Էներգետիկայի և բնական պաշարների նախարար Լևոն Յոլյանը: Իսկ թե իրանական գազի 1 խորանարդ մետրը որքան կարժենա այդ համայնքի բնակիչների համար, նախարարը չցանկացավ բացահայտել:
«Դեռ շինարարական աշխատանքներ պիտի իրականացնեն, բնակչին հասնեն, այն ժամանակ պարզ կլինի»,- ասաց նախարարը: Լրագրողների հարցադրմանը, թե ինչ կլինի, եթե շինարարության ավարտից հետո պարզվի, որ իրանական գազն ավելի թանկ արժե և տնտեսապես ձեռնտու չէ Հայաստանի համար, նախարարն ասաց`եթե թանկ լինի, բնակիչն ինքը կարող է որոշում կայացնել։
«Մինչև հիմա առանց գազի ի՞նչ են արել: Ինքը որոշում կկայացնի՝ սպառել այդ գազը, օգտագործել, թե ոչ»,- ավելացրեց նախարարը:
Մեղրիում և Ագարակում իրանական գազի բաշխման ցանց կառուցելու հուշագիրը երկու երկրի կառավարությունները ստորագրել էին դեռևս 2011թ.-ի դեկտեմբերի 23-ին: Բայց Իրանի նկատմամբ տնտեսական պատժամիջոցների կիրառման հետևանքով, ծրագիրն անորոշ ժամանակով հետաձգվել էր: 2015թ.-ի հոկտեմբերին իրանական կողմը վերսկսել է ծրագրի ֆինանսավորումը և շինարարական աշխատանքների համար 2 մլն դոլար դրամաշնորհ տրամադրել: Շինարարական աշխատանքների մեկնարկը նախատեսվում է 2016թ.-ին և կտևի 6-7 ամիս:
Շինարարությունն իրականացնելու է իրանական «Սաներջի» ընկերությունը, որը մասնագիտացած է էլեկտրաէներգիայի, ջրի, նավթի և գազի արդյունաբերական սարքավորումների և ինժեներատեխնիկական ծառայությունների մատուցման ոլորտում:
Ինչ վերաբերում է Հայաստանի մնացած հատվածում սպառվող ռուսական գազի գնին ու դրա նվազեցման շուրջ ՌԴ կառավարության հետ տարվող բանակցություններին, Էներգետիկայի և բնական պաշարների նախարարն այսօր հրաժարվեց դրա վերաբերյալ մանրամասներ հայտնել.
«Բանակցություններն ընթանում են, աշխատանքներ տարվում են, գազի գինն ինչ կլինի, բոլորդ կիմանաք»,- ասաց Յոլյանը:
Sputnik Արմենիայի թղթակցի հարցին՝ քննարկվո՞ւմ է արդյոք Ռուսական գազի դիմաց դոլարի փոխարեն ռուսական ռուբլով վճարելու տարբերակը, Լևոն Յոլյանը չպատասխանեց, հետ կատակեց՝ «յուանով էլ է քննարկվում»:
