ԵՐԵՎԱՆ, 28 մարտի — Sputnik. Հայաստանն այսօրվա դրությամբ կարող է զգալիորեն կրճատել գազի գինը, սակայն թե որքանով, պարզ կդառնա ավելի ուշ, Sputnik ռադիոկայանի եթերում ասաց անկախ տնտեսագետ Վարդան Բաստանջյանը:
«Դեռևս կես տարի առաջ ես ենթադրում էի ու կանխատեսում, որ ՌԴ-ն հակված է Հայաստան գազ մատակարարել ավելի մատչելի գնով: Այս մասին հայտնեց Ռուսաստանի նախագահը Գյումրի այցի ժամանակ: Այն ժամանակ նա նշեց, որ Ռուսաստանը 1000 խմ գազը տրամադրում է 189 դոլարով», — ասաց Բոստանջյանը:
Ավելի ուշ, նրա խոսքով, Ռուսաստանը իջեցրեց գազի սակագինը մինչև 165 դոլար: Ու նման պարադոքս միշտ էլ եղել է. ինչպե՞ս կարելի է էժան գազը բնակչությանը կրկնակի թանկ գնով վաճառել:
«Փաստորեն այս իրավիճակում ոչ միայն հայկական կողմին է սա զարմացնում, այլև ռուսական: Կարծում եմ` բանակցություններ սկսվեցին, որոնցից հետո, ինչպես մենք հասկանում ենք, իշխանությանն այլ տարբերակ չմնաց, քան իջեցնել գազի սակագինը». — բացատրեց տնտեսագետը:
Բոստանջյանը կարծում է` քանի որ գազի սպառողներին գազը կրկնակի թանկ է վաճառվում, այն մեծ տեղ ունի իջնելու համար:
«Սակայն ներկա պահին ես իրավասու չեմ և չգիտեմ, թե խոսքը որքան չափով գումարը նվազեցնելու մասին է: Նույնիսկ երբ հազար խմ համար սակագինն իջել էր 189-ից 165-ի, սպառողը դա նույնպես չզգաց, սակայն եթե այժմ այդ հարցը սկսել է հաճախ բարձրացվել, սա նշանակում է, որ նրանք (իշխանությունը) այլ տարբերակ չունի», — ասաց նա:
Հայաստան Մեդվեդևի ապրիլյան այցին ու ԵՏՄ վարչապետների հանդիպմանն անդրադառնալով` Բոստանջյանը նշեց, որ դեռ Հայաստանը որևէ զգալի փոփոխություն չի զգացել ԵՏՄ-ին անդամակցելու պահից, սակայն ինքը հուսով է, որ սպասվող հանդիպումները որոշակի փոփոխություններ կարձանագրեն:
«Անցյալ տարի մենք զգալի հաջողություններ չունեցանք, սակայն հենց այդ այցը նշանակում է, որ ԵՏՄ շրջանակում փոխհարաբերությունները ժամանակի ընթացքում բնականոն հունի մեջ կմտնեն», — ասաց փորձագետը:
Նա հույս հայտնեց, որ Հայաստանը մոտ ժամանակներս, ԵՏՄ կազմում ընդգրկված լինելով, անցյալ տարվա համեմատ դրական առաջընթաց կարձանագրի: Նույնը, տնտեսագետի խոսքով, վերաբերում է ԵՏՄ երկրներից ներկրվող ավտոմեքենաների համար ԱԱՀ չկիրառելուն:
Ավելի վաղ Ռուսաստանը Հայաստանի համար երկարացրել էր 165 դոլար հազար խմ գազի համար արտոնագիրը մինչև 2016 թվականի առաջին եռամսյակը: Ներկա պահին Ռուսաստանը Վրաստանից տարանցմամբ դեպի Հայաստան բնական գազի հիմնական մատակարարն է:
