ԵՐԵՎԱՆ, 29 մարտի — Sputnik, Լաուրա Սարգսյան. Հայկական կողմի գործողություններն օրինական են, և հայերն իրավունք ունեն «Սապերավի» ապրանքանիշով գինի արտադրել։ Այս մասին Sputnik Արմենիա պորտալի թղթակցի հետ զրույցում հայտնեց Վրաստանի գինու ազգային գործակալության ղեկավարի տեղակալ Պաատա Չավճանիձեն։
«Եթե պիտակի վրա գրված է, որ «Սապերավին» արտադրված է Հայաստանում, ապա դա որևէ խնդիր չի առաջացնում երկու երկրների համար։ Խնդիր կարող է առաջանալ միայն այն դեպքում, եթե պիտակի վրա նշված լիներ, որ հայկական ապրանքանիշի գինին արտադրված է Վրաստանում», — պարզաբանեց Չավճանիձեն։
Չավճանիձեն բացատրեց, որ եթե Հայաստանը կամ որևէ այլ երկիր արտադրեր Մուկուզանի, Կինձմարաուլի կամ Ծինանդալի գինի, ապա դա իրավախախտում կլիներ, քանի որ նրանց արտադրանքը պաշտպանված է Լիսաբոնյան պայմանագրով։
Հայկական ծագում ունեցող «Սապերավի» գինու արտահանման փաստը հաստատեց նաև Հայ գինեգործների միության նախագահ Ավագ Հարությունյանը։
«Հայաստանում վրացական Սապերավի տեսակի խաղող է աճում, որից այստեղ գինի են պատրաստում և այն արտահանում Հունաստան։ Առավել ևս, որ գինին իր ծագմամբ հայկական արտադրանք է», — եզրափակեց Հարությունյանը։
Նա նաև նշեց, որ սա լայնորեն կիրառվող պրակտիկա է։ Իրենք`վրացիները շատ գինի են արտադրում խաղողի եվրոպական տեսակներից և դրանք արտահանում արտերկիր` որպես վրացական գինի։
Հայաստանում խաղողի երկու վրացական տեսակ է աճում` «Սապերավի», որից պատրաստում են կարմիր գինի, և «Ռքածիթելի»` սպիտակ գինի։
