ԵՐԵՎԱՆ, 6 մարտի- Sputnik. Հայաստանում գինու արտադրության ավանդույթը մի քանի հազար տարվա պատմություն ունի: 2010թ.-ին հնագետների միջազգային խումբն Արենի գյուղի մոտ գտնվող քարանձավներից մեկում հնագույն գինեգործարան է հայտնաբերել: Մասնագետների կարծիքով՝ գտածոն շուրջ 6000 տարեկան է:
Conde Nast Traveller ամսագիրն ուղեցույց է կազմել նրանց համար, ովքեր պատրաստվում են այցելել գինու ավանդույթներով հարուստ մի երկիր, որը Հայաստան է կոչվում:
1. Երևանի Սարյան փողոցը կարելի է «գինու ճանապարհ» կոչել. այստեղ են գտնվում հանրապետության առաջատար արտադրողների գինետները, որտեղ դուք կարող եք համտեսել հայկական լավագույն գինիները:
2. Հայաստանի ռեստորաններում, սրճարաններում ու խանութներում սովորաբար մուսկատի չոր տարբերակն են առաջարկում: Հայկական չոր մուսկատը հիանալի է որպես ապերիտիվ, հատկապես ամռանը և սառը վիճակում: Նույնը կարելի է ասել նաև «Արենի» տեսակի վարդագույն գինու մասին:
3. Ինչ վերաբերում է սպիտակ գինիներին, ապա պետք է առաջին հերթին ուշադրություն դարձնել «Ոսկեհատ» տեսակին: Այդ գինին հիանալի համադրվում է այծի պանրի կամ թեթև աղցանի հետ: Իսկ սպիտակ խաղողի «Կանգուն» տեսակը «Շարդոնեի» թոռն է, «Ռկացիտելիի»՝ ազգականը: Խորոված իշխանը կամ թառափը հիանալի գաստրոնոմիկ զույգ են կազմում «Կանգունի» հետ:
4. Երբ հերթը հասնում է դասական հայկական խոհանոցին, պետք է նախապատվություն տալ կարմիր գինիներին: Կլիմայի առանձնահատկություններից ելնելով՝ Հայաստանի կարմիր գինիները հազվադեպ են տտիպ լինում, դրանք մեծ մասամբ էլեգանտ են: Իսկ այնպիսի էլեգանտ ճաշատեսակը, ինչպիսին տոլման է, հրաշալի կերպով համադրվում է «Արենի» տեսակի կարմիր գինու հետ:
5. Ոչխարի մսի հետ կարելի է վայելել «Հաղթանակ» տեսակի թանձր կարմիր գինին: Այդ տեսակի պոլիֆենոլները և թթուները հավասարակշռում են բուրումնավետ գառան համը:
6. Երբ երեկոն մոտենում է ավարտին, սեղանին պետք է քաղցր բուրումնավետ գինի լինի: Հայաստանում շատ են սիրում մուսկատի «Վարդաբույր» տեսակը: Չրերն ու անուշեղենը հիանալի համադրություն կլինեն ազնվազարմ տեսակի համար:
