ԵՐԵՎԱՆ, 23 մարտի — Sputnik. Զրույցի առիթն օրեր առաջ ռադիոկայանի եթերում հնչեցված Լենա Ավագումովայի պատմությունն էր, ով 10 տարի առաջ ստացել էր բնակարան, որն այնքան անմխիթար վիճակում էր եղել, որ նա չէր ապրել այդ տանը` վերանորոգելու միջոցներ չունենալու պատճառով։
Մնացականյանը հայտնեց, որ, այո, նման խնդիր կա, ժամանակին հանձնվել է անմխիթար վիճակում գտնվող այդպիսի 20-30 բնակարան, այդ հարցով զբաղվել է դատախազությունը, մեղավորները պատասխան են տվել։
Սակայն խնդիրն ավելի մեծ է և համակարգված լուծում է պահանջում։ Տարբեր են նաև շրջանավարտների պահանջները։ Այժմ Հայաստանում բնակարանի է սպասում 253 շրջանավարտ։
«Այդ 253-ի մեջ բազմաթիվ մարդիկ կլինեն, որոնք կասեն` մենք համաձայն ենք նույնիսկ այդ բնակարանին, միայն թե լինի ծածկ, որի համար չեմ վճարի վարձ և ի վիճակի կլինեմ աշխատել զուգահեռաբար, իմ խնդիրները հոգալ, մինչև ոտքի կանգնեմ»,- նշում է ծրագրի պատասխանատուն։
Նա բերեց Լենայի ընկերուհու` Պողոսյան Նաիրայի օրինակը, ով այժմ Լենայի ամուսնու եղբոր կինն է, նույնպես բնակարան է ստացել Հրազդանում, ու նրա ընտանիքն այժմ բնակվում է այնտեղ։ Նրանց խնդիրն այլ է` նրանք պարզապես չեն տեղավորվում այն 35-40 քմ մեջ, որը պետությունը տրամադրել է, և ասում են` ինչ է լինելու 10 տարի հետո, գուցե մենք վերանորոգենք կամ ավելի մեծացնենք, ներդրում անենք այդ բնակարանում։
Իսկ Լենայի եղբայրը` Ավագումյան Մհերը, նույնպես ժամանակին ստացել է բնակարան Աբովյան քաղաքում, սակայն նույնիսկ մեկ օր չի բնակվել այնտեղ, որովհետև գնում էր արտագնա աշխատանքի, և մի քանի տարի հետո զրկվել է այդ բնակարանի իրավունքից։
«Մեկը խիստ խոցելի է, և նրան չի կարելի զրկել կացարանից, իսկ մյուսը զարգացող օղակ է, ուզում է ընդլայնվել ու չի կարողանում, և նրան այդ հնարավորությունը պետք է տալ։ Հիմա պետությունը շատ հիմնարար մոտեցում է ցուցաբերում ոչ միայն մանկատան երեխաներին, այլ տարբեր սոցիալական կարգերի, այդ թվում` սատարող ընտանիքներին, որպեսզի կարծրատիպերը երեխաների մոտ ճիշտ ձևավորվեն, և նրանք իրենց շուրջն ունենան առողջ ընտանիքի մոդել»,- նշեց ծրագրի պատասխանատուն։
Վերադառնալով Լենայի խնդրին` նա հայտնեց, որ հիմա նրա հարցով զբաղվում են։ Նրա ընտանիքում կա երեք անչափահաս երեխա, և պետությունը պետք է օգնի զարգացող այդ օղակին։
Մանկատան շրջանավարտների խնդիրներին նվիրված Ամալյա Պապյանի «Կաղապարից դուրս» ծրագիրն ամբողջությամբ կարելի է լսել Sputnik Արմենիա ռադիոկայանի եթերում ապրիլին։
