ԵՐԵՎԱՆ, 13 մարտի — Sputnik. Մանկատան նախկին սան Լենա Ավագումյանը մեկ սենյականոց բնակարան ստացավ Հրազդան քաղաքում` միկրոշրջանում, ու հասկացավ, որ այնտեղ ապրելն անհնար է։
«Բացարձակ քանդված վիճակում էր բնակարանը. հատակը, բաղնիքը, սանհանգույցը, ամբողջը քանդված էր։ Մինչև մեզ հատկացնելը վերևի հարկերից ջուր էր լցվել, առաստաղը նույնպես քանդվել էր։ Մենք էլ վերանորոգելու հնարավորություն չունենք, ամուսինս հաշմանդամ է, բավարար գումար չի ստանում, երեք անչափահաս երեխա ունենք»,- պատմեց Լենան։
Նա հասկացավ, որ երեխաներին անհնար է այդ բնակարանում մեծացնել, ու տեղավորվեց ամուսնու հայրական տանը, որտեղ նրանց հետ է ապրում ամուսնու եղբոր ընտանիքը, նաև` եղբայրների մայրը։
Լենան չգիտի` այդ բնակարանը կմնա՞ իրենց, թե՞ ոչ, ու կշարունակի՞ ստանալ երեխաների նպաստը, քանի որ այն ստացվում է ըստ բնակության վայրի։
«Բնակարանը հանձնվել է 10 տարի անհատույց օգտագործման իրավունքով, պայմանագրում գրված է, որ այն հանձնված է սեփականության իրավունքով, բայց նախարարությունից ասում են, որ դա երբեք մերը չի լինելու, դա ժամանակավոր կացարան է, որը հատկացրել են ժամանակավոր բնակվելու համար»,- նշում է նա։
Այս տարի լրանում է այդ տասը տարին, բայց թե ինչ պետք է լինի հետո, անհայտ է։
Լենան օգնության համար դիմել է սոցապնախարարություն, որտեղից ասել են, որ ինքը պետք է իր խնդիրներով զբաղվի, օգնության համար դիմի տարբեր կազմակերպություններ կամ ինքնուրույն լուծի իր խնդիրները։
