ՌԴ ՕՏՈՒ-ի ինքնաթիռների խմբերը լքում են Սիրիան։ Սիրիայից ռուսական խմբավորումների հիմնական մասը դուրս բերելու հրամանը Վլադիմիր Պուտինը տվել է նախօրեին։ Նա նշել է, որ ռուսական ավիացիայի առջև դրված խնդիրները լուծվել են։
Ինքնաթիռները շարժվում են խմբերով, յուրաքանչյուրում կա «առաջնորդ»` Տու-154 կամ Իլ-76։ Այս դասավորությամբ նրանք կշարժվեն մինչև ռուսական սահման, որից հետո կվերադառնան իրենց մշտական տեղակայման վայրեր։
Սիրիայում, որտեղ 2011 թվականից քաղաքացիական պատերազմ էր ընթանում, Ռուսաստանի օդային գործողությունները շարունակվում էին 5,5 ամիս։ Այդ ընթացքում, պաշտպանության նախարար Սերգեյ Շոյգուի խոսքով, հաջողվել է դադարեցնել ահաբեկիչներին զենքով ու ռազմամթերքով ապահովումը, փակել ապօրինի նավթի մատակարարման հիմնական ճանապարհները, մի շարք շրջաններում հետ մղել ահաբեկիչներին։ ՌԴ ՊՆ-ի տվյալներով` բացի տեղացի ահաբեկիչներից ոչնչացվել է Ռուսաստանից Սիրիա մեկնած ավելի քան 2 հազար ահաբեկիչ։
Փետրվարի 27-ից Սիրիայում ուժի մեջ է մտել հրադադարի ռեժիմը։ Հրադադարը չի տարածվում ԻՊ-ի, «Ջեբհաթ ան Նուսրայի» (Ալ Քայիդայի սիրիական ստորաբաժանում) և այլ խմբավորումների վրա, որոնք ՄԱԿ ԱԽ-ի կողմից ճանաչվել են որպես ահաբեկչական։
