Խաչիկ Չախոյան, Sputnik.
Իրենց առաջին մեդալները նման ներկայացուցչական մրցույթում նվաճեցին առաջնության հաղթող Վարշամ Բորանյանը և բրոնզե մեդալակիր Կարապետ Չալյանը։
-Վարշամ, շնորհավորում եմ Եվրոպայի չեմպիոն դառնալու կապակցությամբ: Դու միշտ մոտ ես եղել մեդալ նվաճելուն, վերջապես դա հաջողվեց:
— Շնորհակալ եմ շնորհավորանքի համար: Ճիշտ է` ես մենապայքարային մարզաձևում եմ հանդես գալիս, բայց համարում եմ սա նաև թիմային հաղթանակ: Մեր մարզիչները, այդ թվում` հավաքականի և անձնական, մեծապես նպաստել են իմ հաջողություններին: Ես շնորհակալ եմ իրենց: Ինչ վերաբերում է մրցումներին ընդհանրապես, ապա, իրոք, ես մոտ եմ եղել մեդալ նվաճելուն, մասնավորապես 2014 թվականին միայն վնասվածքի պատճառով չկարողացա հասնել նպատակիս: Կարծես թե Աստված չէր ուզում այն ժամանակ, որ ես հաղթեմ: Հիմա, փառք Սստծո, կարողացա աշխատանքիս արդյունքը տեսնել:
- Ռիգայի առաջնության ո՞ր գոտեմարտը կառանձնացնես:
— Պարզ է, որ բոլոր մենամարտերը կարևոր էին, բայց կիսաեզրափակիչն ու եզրափակիչը կառանձնացնեի: Ուժեղ մրցակիցներ էին, դժվար գոտեմարտեր անցկացրի: Հիմա հիշելով այդ գոտեմարտերը` ժպտում եմ, բայց գոտեմարտերից առաջ լրիվ այլ ձևով էի մտածում ու պատրաստվում:
-Եվրոպայի չեմպիոնի կոչումը պարտավորեցնո՞ղ է:
— Դե, իհարկե, արդեն բոլոր մրցումներում պետք է մտածես հաղթանակի մասին: Բայց ինչպես գիտեք, միշտ չէ, որ կարողանում ես հաղթել: Իմ քաշային կարգը (71կգ) օլիմպիական մրցումներում ընդգրկված չէ, ես դեռ կբավարարվեմ Եվրոպայի չեմպիոնի կոչումով: Կշարունակեմ մարզվել, հետո արդեն կտեսնենք, թե ինչ կլինի: Ժամանակը ամեն ինչ ցույց կտա:
Ռիգայի մրցումներում մեծահասակաների մրցաշարում իր առաջին մեդալը նվաճեց 75 կգ քաշային Կարապետ Չալյանը:
-Կարապետ, քեզ նույնպես շնորհավորում եմ բրոնզե մեդալի կապակցությամբ, փաստացի դու նոր հաղթանակներիդ հիմքը դրեցիր:
— Իրոք, կարելի է այդպես համարել: Բարձր կարգի մրցումներում սա իմ առաջին մեդալն է, և ես շատ ուրախ եմ: Կանեմ հնարավորինը, որպեսզի նոր հաղթանակներով ուրախացնեմ երկրպագուներիս:
-Դու հանդես ես գալիս Արսեն Ջուլֆալակյանի հետ նույն քաշային կարգում, չի՞ ճնշում այդ գործոնը:
— Ոչ: Հավաքականը մեկ ընտանիք է, իսկ մենք այդ ընտանիքի անդամներն ենք: Հիմա բոլորիս համար ամենակարևորն օլիմպիական վարկանիշ վաստակելն է: Իսկ թե ով հանդես կգա վարկանիշային մրցումներում, կորոշեն մարզիչները: Երկու դեպքում էլ ես շատ ուրախ կլինեմ:
-Բրոնզե մեդալի համար պայքարում դու մրցեցիր ադրբեջանցի Էլվին Մուրսալիևի հետ, ու ինչպես հետո նշեցիր` կրկնապատկված եռանդով էիր գոտեմարտում:
— Այո, դա այդպես է: Նախևառաջ` ես շատ լավ պատրաստ էի թե´ ֆիզիկապես, թե´ հոգեպես: Ես Մուրսալիևի հետ այլ մրցումներում արդեն երկու անգամ գոտեմարտել էի ու երկու անգամ էլ` պարտվել: Շատ էի ուզում հաղթել, ու կարողացա դա անել` գոտեմարտելով ըստ նախապես մշակած ծրագրի: Ես շատ ուրախ եմ ձեռք բերած արդյունքի համար ու շնորհակալ եմ բոլորին, ովքեր կողքիս էին մինչև մրցումներն ու մրցումների ընթացքում:
