ԵՐԵՎԱՆ, 15 մարտի — Sputnik. Հայաստանում մենաշնորհներ գոյություն չունեն, բացի պետության կողմից կառավարվողներից, լրագրողներին ԱԺ-ում ասաց տնտեսական մրցակցության պաշտպանության պետական հանձնաժողովի նախագահ Արտակ Շաբոյանը։
«Բնական մենաշնորհներ կան` «Գազպրոմ Արմենիան», «ՀԷՑ»-ը, որոնք վերահսկվում են պետության կողմից», — ասաց Շաբոյանը։
Նա պարզաբանեց, որ օրենքի համաձայն` մենաշնորհ է համարվում այն ընկերությունը, որի մասնաբաժինը շուկայում կազմում է 100 տոկոս։ Մնացած դեպքերում ընկերությունը գերիշխող դիրք է զբաղեցնում։
«Խոշոր ընկերություններ կան, որոնք շուկայում առաջատար դիրք են զբաղեցնում, սակայն դա խախտում կամ խնդիր չի համարվում ոչ Հայաստանում, ոչ էլ աշխարհում։ Ազատ մրցակցությունը պաշտպանող ոչ մի կառույց չի պայքարում խոշոր ընկերությունների դեմ», — նշեց Շաբոյանը։
Նրա խոսքով` իր գլխավորած հանձնաժողովը պայքարում է Հայաստանի օրենքում նշված խախտումների և հակամրցակցային գործողությունների դեմ։
Պատգամավորները մի շարք հարցեր բարձրաձայնեցին` կապված Հայաստանում անհամաչափ բարձր գներ ունեցող ապրանքների հետ, մասնավորապես խոսքը սննդամթերքի ու էներգակիրների մասին էր։
Սակայն, Շաբոյանի խոսքով, իրավիճակն այդ ոլորտներում համապատասխանում է օրենսդրությանն ու գների առումով որևէ հակասություն ու անհամամասնություն չկա։ Նա նշեց, որ ՏՄՊՊՀ-ն ուշադիր հետևում է շուկայում տիրող իրավիճակին և խախտումների հայտնաբերման պարագայում պատժում մեղավորներին։
Շաբոյանի կարծիքով` Հայաստանի շուկան ազատ է, և նոր տնտեսվարող սուբյեկտների շուկա դուրս գալու համար որևէ սահմանափակում չկա։
