ԵՐԵՎԱՆ, 15 մարտի — Sputnik. Պաշտոնական այցով Հունաստանում գտնվող Հայաստանի նախագահ Սերժ Սարգսյանն այդ երկրի կառավարությունում հանդիպում է ունեցել Հունաստանի վարչապետ Ալեքսիս Ցիպրասի հետ, տեղեկացնում է ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունը։
Սարգսյանը գոհունակությամբ նշեց, որ այցելության ընթացքում շատ բաց ու կառուցողական քննարկումներ է ունեցել իր հույն գործընկերների` նախագահ Պավլոպուլոսի և վարչապետ Ցիպրասի հետ:
Քննարկվել են հայ-հունական հարաբերությունների ողջ օրակարգը, համագործակցության հեռանկարները:
«Երկուստեք կարևորեցինք սույն այցի շրջանակներում ստորագրվող փաստաթղթերը, որոնք միտված են առողջապահության, բժշկագիտություն, մշակույթի, կրթության ու հետազոտությունների բնագավառներում մեր համագործակցության խորացմանը: Սրանք այն ոլորտներն են, որտեղ մեր երկրները մրցակցային առավելություն ունեն, ուստի պետք է առավելագույնս աշխատենք օգտագործել դա»,- ասաց նախագահը։
Ըստ նախագահի` երկու երկրների հարաբերությունների օրակարգում ամենաթույլ օղակն առևտրատնտեսական կապերն են։ Նա Ցիպրասին հավաստիացրեց, որ Հայաստանը խորապես շահագրգռված է բարեկամ Հունաստանի տնտեսական և քաղաքական կայունությամբ ու առաջընթացով:
Սարգսյանը գոհունակությամբ արձանագրեց, որ ռազմական ոլորտը դարձել է համագործակցության ավանդական ուղղություններից։ Նա շնորհակալություն հայտնեց Հունաստանի կառավարությանը` Հայաստանին քաղաքացիական և ռազմական կրթության ոլորտներում տարիներ շարունակ ցուցաբերվող աջակցության համար։
«Վերջին 20 տարիների ընթացքում ավելի քան 200 հայ զինծառայող և սպա կրթվել է Հունաստանում։ Սա է այն հիմքը, որը թույլ է տալու ապագայում նորանոր հաջողություններ արձանագրել այս ոլորտում։ Մենք երբևէ չպետք է հեռանանք այն գիտակցումից, որ մեր երկու ժողովուրդների անվտանգությունը փոխշաղկապված է»,- նշել է նախագահը:
Սարգսյանը Հունաստանի հետ համագործակցությունը կարևորեց նաև Հայաստան-ԵՄ համապարփակ համագործակցության համատեքստում, քանզի ԵՄ-ն շարունակում է մնալ Հայաստանի կարևորագույն գործընկերներից մեկը թե՛ բարեփոխումների իրականացման առումով, թե՛ որպես տնտեսական խոշոր գործընկեր։
«Առանձնահատուկ կարևորում ենք ԼՂ հիմնախնդրի խաղաղ կարգավորման հարցում Հունաստանի հավասարակշռված դիրքորոշումը և աջակցությունը ԵԱՀԿ Մինսկի խմբի համանախագահների շարունակական ջանքերին»,- ընդգծեց ՀՀ նախագահը։
Նա հայ-հունական բարեկամության հարատևման գործում ընդգծեց հունահայ համայնքի մեծ դերը: Ըստ նրա, հայ ժողովուրդը երբեք չի մոռանա ցեղասպանությունը վերապրած հայերին օգնության ձեռք մեկնած եղբայրական հույն ժողովրդի աջակցությունը։ Նա բարձր գնահատեց Հունաստանի սկզբունքային դիրքորոշումը այդ ծանրագույն հանցագործության ճանաչման և դատապարտման հարցում:
«Մեր ազգային ողբերգության 100-րդ տարելիցին ընդառաջ Հունաստանը վերահաստատեց այդ հարցում իր հանձնառությունը՝ ընդունելով Ռասիզմի և այլատյացության դեմ օրինագիծը (2014թ. սեպտեմբերի 9-ին), որով քրեականացվեց նաև Հայոց ցեղասպանության ժխտումը՝ օրինակելի ուղերձ հղելով համաշխարհային քաղաքակրթությանը: Հայաստանի ԱԺ-ն էլ իր հերթին 2015թ. միաձայն ընդունեց Օսմանյան կայսրության կողմից իրականացված հույների և ասորիների ցեղասպանությունը դատապարտելու մասին հայտարարությունը: Սա վառ վկայությունն է նրա, որ համերաշխության ոգին դարեր շարունակ միավորել է ու միավորելու է մեր ժողովուրդներին»,- նշեց Սարգսյանը:
Ըստ նախագահի` երկու երկրների բազմադարյա հոգևոր և մշակութային ընդհանրությունների մասին է վկայում նաև Աթենքի Բյուզանդական և քրիստոնեական թանգարանում բացված «Հայաստան. Արարատի ոգի» խորագիրը կրող ցուցահանդեսը:
«Բարեկամության ոգին պահպանելու տեսանկյունից նաև շատ կարևոր համարեցինք բարձրաստիճան փոխայցելություններն, ու հենց այս համատեքստում ես պարոն Ցիպրասին հրավիրեցի այցելել Հայաստան: Շատ ուրախ եմ, որ նա ընդունեց հրավերը, և մեկ անգամ ևս մենք անդրադարձանք այն խնդրի կարևորությանը, որ պետք է մշտապես աշխատել բարեկամության օգտին»,- հայտնեց Սարգսյանը:
Ըստ նախագահի` բարեկամությունը պետք է սնել, խթանել, որի ձևերից մեկն էլ հաճախակի հանդիպումներն են:
