ԵՐԵՎԱՆ, 15 մարտի — Sputnik. ՌԴ բուհերում դիմորդների փաստաթղթերի ընդունման վերջնաժամկետը մարտի 18-ն է: Այս մասին այսօր Sputnik Արմենիա միջազգային մամուլի կենտրոնում կազմակերպված ասուլիսում հայտարարեց Հայաստանում Ռուսաստանի դեսպանատան խորհրդական Օլեգ Շապովալովը:
Շապովալովի խոսքով` Հայաստանին հատկացվող տեղերի թիվը տարեցտարի ավելանում է:
«Մենք ուրախ կլինենք, որ ավելի ու ավելի շատ ընդունակ, տաղանդավոր մարդիկ կարողանան մասնակցել մրցույթին և մեկնեն Ռուսաստան՝ լավ կրթություն ստանալու»,- ասաց Օլեգ Շապովալովը:
Այս պահի դրությամբ ռուսաստանյան բուհերի բակալավրիատում, ասպիրանտուրայում և օրդինատուրայում սովորելու հայտ է ներկայացրել 389 դիմորդ:
Երևանում Գիտության ու մշակույթի ռուսական կենտրոնի տնօրեն Մարկ Կալինինի խոսքով` ՌԴ-ում անվճար կրթության ծրագրի նկատմամբ հայ դիմորդների հետարքրքությունը բարձր է: Այս պահին 1 տեղի համար արդեն 7 մարդ է դիմել, բայց կազմակերպիչները վստահ են, որ մինչև հայտերի ընդունման ժամկետի ավարտը՝ մարտի 18-ը, ավելի քան 500 դիմորդ դիմում կներկայացնի՝ ՌԴ առաջատար բուհի ուսանող դառնալու համար:
Հայտերն ընդունվում են Երևանում Գիտության ու մշակույթի ռուսական կենտրոնի գրասենյակում, կամ http://russia.study էլեկտրոնային հասցեով:
Մարտի 21-27-ը կկայանա մրցույթի թեստային փուլը՝ ռուսաց լեզվից և մասնագիտական այն առարկաներից, որտեղ մրցույթն առավել բարձրն է, մասնավորապես՝ բժշկության գծով:
Բայց Հայաստանն առաջատար է հատկապես տեխնիկական մասնագիտությունների ոլորտում: Հայաստանից տարեկան շուրջ 150 մարդ է ընդունվում ՌԴ–ի լավագույն բուհերի ամենաբարդ ֆակուլտետներ: Մարկ Կալինինի համոզմամբ, այս տարին ևս բացառություն չի լինի:
Ի դեպ, այս տարի որոշում է կայացվել ընտրություն կատարել նաև առարկայական օլիմպիադաների հաղթողների շրջանում:
Հետաքրքրական է, որ ոչ միայն դիմորդն է ընտրում իր ցանկալի ռուսաստանյան բուհը, այլև բուհն է ընտրում իր ապագա ուսանողին:
«Ընտրությունն իրականացվում է երկու փուլով. նախ աշխատանքային խումբն ընտրում է անհրաժեշտ 223 թեկնածուներին, որոնք ցանկանում են ընդունվել ռուսաստանյան բուհերից որևէ մեկը, ապա այդ հավակնորդների տվյալները ներկայացվում են ընդհանուր տեղեկատվական համակարգ, որտեղից ՌԴ բուհերն ընտրում են իրենց ուսանողներին: Ասել է թե՝ ընտրությունն իրականցվում է գլոբալ մասշտաբով»,- ասաց Մարկ Կալինինը՝ ավելացնելով, որ հայաստանցի դիմորդներն այդ մրցակցությունը պատվով են հաղթահարում:
