ԵՐԵՎԱՆ, 15 մարտի – Sputnik. Ցուցահանդեսը կազմակերպվում է Երևանում Գիտության և մշակույթի ռուսական կենտրոնի հետ համատեղ: Ինչպես այսօր Sputnik Արմենիա միջազգային մամուլի կենտրոնում կազմակերպված ասուլիսում ներկայացրեց «Ինտեր-էքսպո» ընկերության գլխավոր տնօրեն Ադելինա Քոչարյանը, ցուցահանդեսը բաժանված է լինելու երկու հատվածի:
Առաջին հարկում ներկայացվելու են հայաստանյան, երկրորդ հարկում՝ ռուսաստանյան բուհերը: Նման ամբողջական ներկայացումը, Ադելինա Քոչարյանի խոսքով, հայաստանցի դիմորդներին հնարավորություն կտա առավել ամբողջական պատկերացում կազմել Հայաստանում և Ռուսաստանում գործող կրթական ծրագրերին ու կրթական հաստատություններին, և ճիշտ կողմնորոշվել ապագա մասնագիտության ընտրության հարցում:
Երևանում Գիտության ու մշակույթի ռուսական կենտրոնի տնօրեն Մարկ Կալինինն էլ տեղեկացրեց նաև, որ ցուցահանդեսին զուգահեռ Երևանում անցկացվելու է նաև հայաստանցի դիմորդների՝ ռուսաստանյան բուհեր ընդունելության մրցույթի կազմակերպման աշխատանքային խմբի նիստը, որի կազմում ընդգրկված են ՀՀ-ում ՌԴ դեսպանության, ՀՀ-ում ռուս հայրենակիցների միությունների, ՀՀ ԿԳՆ և մշակույթի նախարարության, ՀԱՊԿ–ի, ինչպես նաև ռուսաստանյան մասնագիտացված կազմակերպությունների և առաջատար բուհերի ներկայացուցիչներ:
Աշխատանքային խումբը մրցութային կարգով պետք է ընտրի այն 223 հայաստանցի դիմորդներին, որոնք հայտ են ներկայացրել ՌԴ բուհեր ընդունվելու համար:
Մարկ Կալինինի խոսքով, մրցույթն այս տարի բավական մեծ է, այս պահին արդեն փաստաթղթեր է ներկայացրել 389 դիմորդ: Հայտերի ընդունումը, սակայն, կշարունակվի մինչև հաջորդ շաբաթվա վերջը:
