«Ռ-Սպորտ» գործակալության հատուկ թղթակից Օլեգ Բոգատովին տված հարցազրույցում Լևոն Արոնյանը պատմել է իր հարսնացուի՝ Արիանայի և գալիք հարսանիքի, Տիգրան Պետրոսյանի բացառիկ տաղանդի և շատ այլ բաների մասին:
-Մոսկվայում խաղալը Ձեզ դրական տրամադրություն հաղորդու՞մ է:
— Իհարկե, թեև Մոսկվան Հայաստանի քաղաքացիների համար հարազատ վայր չէ, բայց հաստատ օտար էլ չէ: Այստեղ մենք մեզ լավ ենք զգում, ես այստեղ շատ ընկերներ ունեմ, և ինձ դուր է գալիս Մոսկվայում գտնվել:
-Բայց կա և հակառակ կողմը. հոգեբանական տեսանկյունից դժվար չէ՞, երբ քեզ շրջապատում են մտերիմ մարդիկ և ակնկալում են միայն հաղթանակ:
— Դա ինձ վրա այնքան էլ չի ազդում, որովհետև ես խաղի ժամանակ չեմ տեսնում, թե ով է ինձ շրջապատում: Ոչ, դա այնպիսի բան է, որ երբեք չես կարող գուշակել՝ լա՞վ կազդի, թե՞ վատ:
-Երբ խոսում ենք շախմատի հայկական դպրոցի մասին, հիշում ենք Տիգրան Պետրոսյանին և Ռաֆայել Վահանյանին: Դուք որևէ բան վերցրե՞լ եք նրանցից:
— Ես հավանաբար իմ ոճով ավելի մոտ եմ Ռաֆայել Վահանյանին: Դա ավելի ինտուիտիվ մոտեցում է շախմատին, որը մոտ է նաև Պետրոսյանին: Մեզ առանձնացնում է այն, որ մենք սիրում ենք շախմատ խաղալ, թե՛ դիրքային խաղը, թե՛ խուսանավումը մոտ է մեզ: Այսինքն` դանդաղ և առանց շտապելու խաղալը: Բայց շատ բարդ է ունենալ վտանգը կանխազգալու և դիրքային գաղափարներն ընդգրկող այնպիսի մաքուր տաղանդ, ինչպես Պետրոսյանը:
-Լևոն, փոխվե՞լ է Մոսկվան Ձեր վերջին այցելությունից հետո:
— Փոխվել է, ես զբոսնել եմ քաղաքի կենտրոնում և նկատել եմ, որ քաղաքն ավելի մաքուր է: Գուցե դա կապված է եղանակի հետ. երբ վերջին անգամ Մոսկվայում էի, փետրվար ամիսն էր, և բավական մռայլ եղանակ էր:
-Հնարավոր է` դա կապված է այն բանի հետ, որ վերջերս վերացրել են շատ կրպակներ…
— Հավանաբար, տարածությունն իսկապես մեծացել է:
-Ձեր մտերիմներից որևէ մեկը լինելո՞ւ է Ձեր կողքին Մոսկվայի մրցաշարի ժամանակ:
— Այո, հարսնացուս՝ Արիանան:
-Որտեղի՞ց է Արիանան ծնունդով, և որտե՞ղ եք ծանոթացել:
— Արիանան Ավստրալիայից է, նա մասնագիտությամբ տնտեսագետ է: Մենք արդեն երկար ժամանակ հանդիպում ենք՝ 9 տարի: Ծանոթացել ենք Եվրոպայում, նա նույնպես շախմատի սիրահար է:
-Հարսանիքը շու՞տ կլինի:
— Շատ եմ ուզում հավատալ:
-Դուք դեռ չե՞ք որոշել օրը:
— Բանն այն է, որ Արիանան լուրջ աշխատանք ունի, ես չափազանց շատ մրցաշարեր ունեմ, ուստի բավական բարդ է ծրագրելը: Հենց Մոսկվայի մրցաշարից հետո կարելի է մտածել այդ մասին (ժպտում է):
-Ես նույնիսկ գուշակում եմ, թե ինչը լավ հարսանեկան նվեր կլինի: Հաջողություն եմ մաղթում Ձեզ:
— Շնորհակալություն:
