ԵՐԵՎԱՆ, 8 մարտի — Sputnik. «Արմենիա» ավիաընկերության առաջին չվերթը տեղի կունենա ապրիլի 21-ին, հայտնեց Հայաստանի քաղաքացիական ավիացիայի գլխավոր վարչության մամուլի քարտուղար Ռուբեն Գրձելյանը։
«Ուղղությունը՝ Իսրայել։ Չվերթի ավիատոմսերն արդեն վաճառքում են»,- գրել է Գրձելյանը Facebook-ի իր էջում։
«Արմենիա» ավիաընկերության հիմնադիրներն են Աշոտ Թորոսյանը (51% բաժնետոմս), Թամազ Գաիաշվիլին (25%) և Ռոբերտ Հովհաննիսյանը (24%)։ Թամազ Գաիաշվիլին վրացական "Airzena" ավիաընկերության հիմնադիրը և ընկերության Տնօրենների խորհրդի նախկին նախագահն է, իսկ Ռոբերտ Հովհաննիսյանը` նրա տեղակալը։
Ինչպես ավելի վաղ Sputnik Արմենիայի հետ զրույցում ասել էր ազգային փոխադրողի գլխավոր տնօրեն Ռոբերտ Հովհաննիսյանը, առաջին չվերթը կիրականացվի Boeing 737-700 ինքնաթիռով։
Հայաստանն առանց ազգային փոխադրողի մնաց 2013-ին «Արմավիա» ընկերության սնանկանալուց հետո։ Դրանից հետո Հայաստանի ավիաշուկա մտավ Air Armenia ընկերությունը, որը 2014 թ. հոկտեմբերին սնանկության եզրին հայտնվեց ու դադարեցրեց թռիչքները։
