ԵՐԵՎԱՆ, 20 հունվարի — Sputnik, Լաուրա Սարգսյան. Հայկական ավիաշուկայում Armenia անվանումով նոր ընկերություն կգործի, Sputnik Արմենիա պորտալին հայտնեց ընկերության գլխավոր տնօրեն Ռոբերտ Հովհաննիսյանը։
Նա նշեց, որ ընկերությունն արդեն գրանցվել է Հայաստանում, առաջին չվերթը կիրականացնի Boeing 737-700-ով, սակայն ուղղությունը դեռ հայտնի չէ։
Ռոբերտ Հովհաննիսյանը նախկինում եղել է Georgian Airways-ի («Airzena») տնօրենի պաշտոնակատարը։
Ավիաընկերության անձնակազմը բաղկացած կլինի 350 հոգուց, նրանց թվում կլինեն նաև «Airzena»-ի մի քանի աշխատակիցներ։ «Armenia»-ն կօգտագործի «Airzena»-ի ինքնաթիռները։
«Այս պահին դեռ ընտրում ենք աշխատակիցներին, տեխնիկական որոշ հարցեր ենք լուծում թռիչքներ իրականացնելու արտոնագիր ստանալու համար։ Աշխատակիցներին ընտրելու առանցքային պահանջն այն է, որ նրանք համապատասխանեն եվրոպական չափանիշներին»,- նշեց Հովհաննիսյանը։
Ինչպես հայտնում է վրացական «Կոմերսանտ» թերթը, «Airzena»-ն վերջին շրջանում խնդիրներ է ունեցել վրացական շուկայում, և ընկերությունը դադարեցրել է դեպի Եվրոպա իրականացվող թռիչքները (մասնավորապես ` Վիեննա, Փարիզ, Ամստերդամ), և այս պահին ընկերությունը թռիչքներ է իրականցանում Մոսկվայի և Թել Ավիվի ուղղությամբ։
Պետք է նշել, որ հայկական ավիաշուկայում էլ ամեն ինչ հարթ չէ։ Միջազգային մի քանի ավիափոխադրողներ հեռացել են շուկայից և գերակշռող են դարձել ռուսական ավիաընկերությունները։ Միաժամանակ Էկոնոմիկայի նախարարության ավիացիայի հարցերով փորձագետ Աննա Չոբանյանն ավելի վաղ հայտնել էր, որ իրավիճակը փոխվել է «բաց երկնքի» քաղաքականության ամրագրումից հետո, իսկ հայկական ավիաշուկան լքած որոշ ընկերություններ վերադարձել են, մասնավորապես ` «Չեխական ավիաուղիները» և լեհական LOT-ը։ Բացի այդ, հետաքրքրություն է դրսևորել նաև Qatar Aiways-ը։
Հայաստանում մինչև հիմա ազգային ավիափոխադրող չկա։ «Արմավիա» ազգային ավիափոխադրողը գործունեությունը դադարեցրել է 2013 թվականի ապրիլին։
Նույն տարում ի հայտ էր եկել Air Armenia ընկերությունը, որը բացի ԱՊՀ-ի երկրներ, Եվրոպա և Մերձավոր Արևելքի, Ասիայի ու Աֆրիկայի երկրներ իրականացվող բեռնափոխադրումային չարտերային թռիչքներից, սկսել էր նաև ուղևորափոխադրումներ իրականացնել։ Սակայն այս պահին Air Armenia-ն նույնպես թռիչքներ չի իրականացնում պարտքեր կուտակելու պատճառով։
