ԵՐԵՎԱՆ, 5 մարտի — Sputnik. 2009 թվականից լուրջ աշխատանքներ են կատարվում, որպեսզի Հայաստանում ստեղծվի մի կենտրոն, որը համալրված կլինի համաշխարհային բոլոր չափանիշներին համապատասխան սարքավորումներով և որտեղ հնարավոր կլինի ախտորոշել ու բուժել քաղցկեղը:
Կենտրոնը կառուցվել է Երևանի Ալիխանյանի անվան ֆիզիկայի ինստիտուտի տարածքում: 2009 թվականին մեկնարկած ծրագիրը, որով նախատեսվում էր ռադիոիզոտոպների արտադրության կենտրոն ստեղծել, հետագայում ընդլայնվեց և դարձավ Ուռուցքաբանության գերազանցության ազգային կենտրոն, որը պետք է նախնական տարբերակում ունենար երեք բաղադրիչ՝ տարբեր շենքերի տեսքերով, և այնտեղ պետք է տեղակայված լինեին նորագույն սարքավորումները:
«Առաջին բաղադրիչը, կարելի է ասել, 99 տոկոսով ավարտված է, կան զուտ մեխանիկական ինստալյացիայի հարցեր, ամբողջ սարքերը տեղադրված են, և կենտրոնը կոչվում է Ռադիոիզոտոպների արտադրության կենտրոն»,- գնահատելով կատարված աշխատանքները փոխնախարարը նշեց,-Միրիջանյանը:
Սա եզակի կենտրոն է Հայաստանի համար, որովհետև այդտեղ արտադրվելու է ֆտոր-18 իզոտոպ, որը հետագայում նույն կենտրոնի լաբորատորիայում դեղ է դառնալու: Այնուհետև նույն կենտրոնում այդ դեղը ներարկվելու է հիվանդին, և նա հետազոտվելու ու ախտորոշում ստանալու հնարավորություն է ունենալու:
Կենտրոնում նաև հետազոտական աշխատանքներ են իրականացվելու և, քանի որ այն գտնվում է Ալիխանյանի անվան ֆիզիկայի ինստիտուտի տարածքում, մի հատված էլ հատկացվելու է ֆիզիկոսներին, որպեսզի նրանք իրենց գիտական հետազոտություններն անցկացնեն:
Փոխնախարարը վստահեցնում է, որ Հայաստանում մեծ ուշադրություն է հատկացվում օնկոլոգիական հիվանդությունների դեմ պայքարին, քանի որ երկրում քաղցկեղային հիվանդությունների հետևանքով գրանցված մահացությունների ընդհանուր թիվը երկրորդ հորիզոնականն է զբաղեցնում սրտանոթային համակարգի հիվանդություններից հետո:
Այս կենտրոնում ախտորոշումներ են իրականացվելու: Բայց քանի որ այն Ուռուցքաբանության գերազանցության հայկական կենտրոնի մի բաղադրիչ է, ապա այստեղ նաև կկառուցվի երկրորդ բաղադրիչը, որտեղ հնարավոր կլինի ճառագայթային բուժում իրականացնել: Կտեղադրվեն այնպիսի սարքավորումներ, ինչպիսիք կան ՌԴ-ի, Իսրայելի և Եվրոպայի մի շարք երկրներում: Այս բաղադրիչի գործարկումից հետո հայաստանցիները ստիպված չեն լինի բուժվելու համար գնալ այլ երկրներ:
Բարձրակարգ ու գերճշգրիտ սարքավորումներից և բուժման ժամանակակից մեթոդից օգտվելու հնարավորություն կունենան հայաստանցի բոլոր հիվանդները: Մահճակալների քանակը հաշվարկվել է հիվանդների թվի, հիվանդությունների զարգացման դինամիկայի և նույնիսկ գաղտնի շրջանում գտնվող հիվանդների մոտավոր քանակի բանաձևով: Բուժման համար նախատեսված վճարը, ըստ փոխնախարարի, շատ բարձր չի լինի:
«Պահանջարկն ամբողջությամբ բավարարվելու է: Կենտրոնը կառուցվում է հենց այդ նպատակով, որպեսզի սպասարկի Հայաստանի և ոչ միայն Հայաստանի բնակչությանը: Գներն էլ բավականին մատչելի են լինելու, համենայն դեպս՝ հետխորհրդային տարածքի համար»,- վստահեցրեց Միրիջանյանը:
Այսօր ՀՀ քաղաքացիներից շատերը լքում են իրենց երկիրը և ոչ մատչելի հետազոտություն անցնում այլ երկրներում: Իսկ նորաստեղծ կենտրոնը կօգնի, որ նրանք այստեղ՝ իրենց երկրում, ենթարկվեն անհրաժեշտ հետազոտության ու շարունակեն հետագա բուժումը: Երբ կենտրոնի ամբողջ ներուժն օգտագործվի, մասնագետները կկարողանան ընդունել նաև այլ երկրների քաղաքացիներին:
Կենտրոնը կնպաստի բժշկական զբոսաշրջության զարգացմանը: Իհարկե, գները նույնը չեն լինի, ինչ Հայաստանի քաղաքացիների համար: Սակայն ելնելով այն հանգամանքից, որ տարածաշրջանում նմանատիպ կենտրոններ կան Վրաստանի մայրաքաղաքում, Թուրքիայում, Ռուսաստանում, ապա արտասահմանցիներին բուժելու հարցում գնային ճկուն քաղաքականություն կիրականացվի:
