ԵՐԵՎԱՆ, 28 փետրվարի — Sputnik, Խաչիկ Չախոյան. Փետրվարի 26-ին կայացան ՖԻՖԱ-ի նախագահի ընտրությունները, որոնց արդյունքում ֆուտբոլի համաշխարհային կազմակերպությունն առաջիկա չորս տարիների ընթացքում գլխավորելու է Ջանի Ինֆանտինոն: ՈւԵՖԱ-ի գլխավոր քարտուղարը, ընտրությունների երկրորդ փուլում ստանալով 115 ձայն, շրջանցեց Սալման բին Իբրահիմ Ալ-Խալիֆային, ով իր հերթին ստացավ 88 ձայն: Անկասկած, եվրոպացիների համար շատ կարևոր հաղթանակ էր սա:
Ֆուտբոլի Հայաստանի ֆեդերացիան մինչև ընտրություններն արդեն հայտարարել էր, որ սատարելու է 45-ամյա Ինֆանտինոյին: Փաստացի հաղթել է այն թեկանծուն, ում մենք սատարում էինք:
Տեղեկատվությունն այն մասին, որ Ինֆանտինոն հայ է, գտնվեց նաև ռուսական մի քան կայքերում: Սակայն այս տեղեկությունը որևէ փաստով չի ամրագրվում: Ստացվում է` գուցե հայ է կամ հայկական արմատներ ունի։
Կրթությամբ իրավաբան Ինֆանտինոն ծնվել է 1970 թվականի մարտի 23-ին Շվեյցարական Բրիգ քաղաքում: Աշխատել է որպես խորհրդատու մի քանի եվրոպական երկրների ֆեդերացիաներում: ՈւԵՖԱ-ում իր գործունեությունը ծավալել է սկսած 2000 թվականից, իսկ 2009 թվականից ֆուտբոլի եվրոպական ֆեդերացիաների միության գլխավոր քարտուղարն էր:
Ամուսնացած է, ունի չորս երեխա, տիրապետում է վեց լեզվի:
