Արման Վանեսքեհյան, Sputnik.
Սիրիայում սկսվել է հրադադարը: Ցանկանում ենք հավատալ, որ դա կլինի կայուն և երկար: Սակայն շատ փորձագետներ, վերլուծաբաններ մինչև հիմա համոզված են, որ գործընթացը բարդ բնույթ կլինի: Բանն այն է, որ տարածաշրջանում գործում են մի շարք գործոններ, որոնց պատճառով պարբերաբար մարտական գործողություններ կբռնկվեն, կարծում է քաղաքական վերլուծաբան Ստեփան Գրիգորյանը:
«Բանն այն է, որ Բաշար Ասադին հավատարիմ զորքերի մարտական գործողությունները կշարունակվեն այն շրջաններում, որտեղ դիրքավորվել են ԻՊ-ը, Ջաբհաթ ան Նուսրան և այլն: Իսկ դա հնարավորություն կտա այն ուժերին, որոնց ձեռնտու չէ հրադադարը, ցանկացած պահի սադրանքներ կազմակերպել: Նույն Թուրքիան, օրինակ, անպայման կօգտվի այդ հնարավորությունից, որովհետև պաշտոնական Անկարան, միևնույն է, հարվածելու է քրդերի դիրքերին»,- պնդում է փորձագետը:
Փորձագետը համոզված է, որ չի կարելի հաշվի չնստել Թուրքիայի հետ, որն ամեն դեպքում օգնելու է Ջաբհաթ ան Նուսրային և Իսլամական պետությանը, որի մեջ հսկայական ներդրումներ է կատարել: Մյուս կողմից` Անկարան անպայման կկատարի սիրիացի քրդերի դեմ ուղղված քայլեր:
Բայց չէ՞ որ Թուրքիան, լինելով տարածաշրջանի խաղացողներից մեկը, սեփական խաղն է վարում, որը համաձայնեցված չէ ԱՄՆ-ի հետ: Եվ կշարունակի իրեն նույն կերպ պահել նաև հետագայում, համոզված է Ստեփան Գրիգորյանը:
Ի դեպ, քաղաքական վերլուծաբանի խոսքերը հաստատվել են հրադադարի առաջին իսկ ժամերին, որի ժամկետները և պայմանները քննարկվել են ՌԴ-ի և ԱՄՆ-ի միջև: Փետրվարի 27-ի գիշերը, երբ հրադադարի ռեժիմն արդեն ուժի մեջ էր մտել, ինչ-որ ահաբեկչական ջոկատներ գնդակոծել են Հալեպը:
Ցանկանում ենք հավատալ, որ Հալեպի բնակելի թաղամասերը գնդակոծել են Ջաբհաթ ան Նուսրայի գրոհայինները, որոնց վրա չի տարածվում հրադադարի ռեժիմը և որոնց հետ հաշվեհարդար կտեսնեն առաջիկայում:
Սակայն դա դեռ ամենը չէ: Արդեն առավոտյան հայտնի է դարձել, որ գիշերը հրադադարը կնքելուց առաջ ԻՊ ջոկատներն անցել են Թուրքիայի տարածքով և հարվածել Թել Աբյադում գտնվող քրրդերին, որը գտնվում է թուրք-սիրիական սահմանին: Այնտեղ թեժ մարտեր են ընթացել, պնդում են Սիրիայի հյուսիսային շրջանների աղբյուրները, որոնց մասին տեղեկատվությունն արդեն սկսել է հայտնվել արևմտյան ԶԼՄ-ներում:
Փաստորեն այնպես է ստացվում, որ մեր փորձագետը լիովին իրավացի էր: Թուրքիան իր տարածքը կտրամադրի ահաբեկչական կազմակերպությունների ջոկատների տեղաշարժման համար, որոնք հենց Սիրիայում կենթարկվեն ասադյան հրետանու գնդակոծությանը և ռուսական ավիացիայի ռմբակոծությանը:
«Նույնիսկ սիրիացի քրդերի ինքնիշխանության նվազագույն աստիճանը լուրջ սպառալիք է Թուրքիայի համար: Եվ եթե այդ տեսանկյունից դիտարկենք Անկարայի դիրքորոշումը, ապա պետք է հաշվի առնենք, որ Թուրքիան վարելու է իր խաղը և չի ենթարկվի նույնիսկ Վաշինգտոնի հորդորներին և հրամաններին»,- կարծում է քաղաքահետը:
Ինչ էլ որ լինի, հրադադարի ռեժիմն արդեն ուժի մեջ է, և ցանկանում ենք հուսալ, որ մինչև մարտի 7-ը կողմերը հանդես կգան բանակցությունների վերաբերյալ ինչ-որ մշակումներով, որոնք այդ օրը կսկսվեն Ժնևում և կտևեն երեք շաբաթ, հայտարարել է Սիրիայի հարցով ՄԱԿ հատուկ բանագնաց Ստաֆան դե Միստուրան:
