ԵՐԵՎԱՆ, 27 փետրվարի- Sputnik. Չինաստանի կիբերտարածքի հարցերի վարչությունը վերջին շրջանում սոցիալական ցանցերում արգելափակել է օգտատերերի 580 աքաունթ` տարբեր խախտումների համար, ասվում է կարգավորիչի կայքում:
Հաղորդվում է, որ աքաունթներն արգելափակվել են տեղեկատվության բովանդակության համար, որը խախտում է ինտերնետում տվյալների տարածման կանոնները, ինչպես նաև «մոլորության մեջ գցում այլ օգտատերերի»: Աքաունթների տերերը հրապարակել են նաև տեղեկատվություն, որը խախտում է Չինաստանի անվտանգությունը, ինչպես նաև չհաստատված լուրեր են տարածել:
Ինչպես նշում է Global Times հրատարակությունը, արգելափակվածների շարքում են Չինաստանում հայտնի անձանց աքաունթներ, որոնք ավելի քան 500 հազար բաժանորդ ունեն Weibo սոցիալական ցանցում:
Փետրվարի սկզբին կարգավորիչը հաղորդել էր, որ ավելի վաղ փակվել է անցանկալի բովանդակություն ունեցող ավելի քան 200 կայք: Հաղորդվել էր, որ կայքերն արգելափակվել են, որովհետև պարունակել են արգելված նյութեր, այդ թվում՝ ահաբեկչական, պոռնոգրաֆիկ բնույթի, ինչպես նաև կեղծ տեղեկատվություն: Բացի այդ, իշխանությունները նաև նախկինում փակել էին ավելի քան 6 հազար աքաունթ` WeChat, QQ և այլ սոցցանցերում:
Չինաստանում տեղեկատվության տարածման ոլորտը, այդ թվում` ինտերնետային ԶԼՄ-ների կողմից, մինչև հիմա փակ է: Չինաստանում անհասանելի են Google-ի կայքերը, արգելափակված են Facebook և Twitter հայտնի սոցցանցերը, մի շարք արևմտյան հրատարակությունների կայքեր ինչպես չինարեն, այնպես էլ` անգլերեն լեզուներով: Վերջին տարիներին ՉԺՀ-ում ընդունվել են մի շարք նորմատիվ և գաղափարախոսական փաստաթղթեր, որոնք պարտավորեցնում են ազգային ինտերնետային ընկերություններին և ԶԼՄ-ներին` ուշադիր հետևել ինտերնետում տեղեկատվության տարածման որակին:
